Unang adlaw sa F2F classes sa Cotabato nagmalampuson

Hulagway gikan sa DepEd-Cotabato Division
Hulagway gikan sa DepEd-Cotabato Division

KIDAPAWAN CITY -- Gidayeg sa mga opisyal sa Department of Education (DepEd)-Soccsksargen ang unang adlaw sa face-to-face classes sa probinsiya sa Cotabato.

Hapsay ang klase sa Paco National High School sa Kidapawan City ug Bato Elementary School sa Makilala.

Hugtanon nga gipatuman sa DepEd Division sa probinsiya ang minimum health protocols sa mga estudyante ug magtutudlo batok coronavirus disease 2019 (Covid-19).

Kahinumdoman nga niadtong 2020, una nga giwala ang face-to-face classes gumikan sa pagkuyanap sa kagaw.

Tungod niini, gibag-o ang pamaagi sa departamento sa pagtudlo ngadto sa modules ug online classes.

Apil ang Paco National High School sa Kidapawan City miabli sa limitadong klase sa mga magtutungha.

Sumala kang DepEd 12 Curriculum Learning and Management Division Chief Gilbert Barrera nga malampuson, organisado ug nasunod ang minimum health protocols sa maong eskuwelahan.

Moabot sa 111 ka mga Grade 11 ug 68 ka mga Grade 12 o Junior lakip na Senior High School misulod sa limitado nga klase diin hangtud sa 20 ka mga estudyante lamang matag lawak.

Gitunga usab ang oras sa mga estudyante aron dili "overcrowded" ang tulunghaan ingon man dali lamang makontrol sa mga magtutudlo.

Gawas sa Paco National High School, nagmalampuson sab ang unang adlaw sa F2F sa Bato Elementary School sa Barangay Bato, Makilala.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph