KIDAPAWAN CITY -- Pasakaan og kaso ang kalapasan sa Republic Act 11346, o ang Tobacco Tax Law of 2019, ang lima ka tawo nga nadakpan human nagpalusot og esmagol nga mga sigarilyo alas 2:00 sa hapon, Lunes, Makilala, North Cotabato.

Giila ang mga suspek nga sila Rey Arnold Etil Mariscal, Rheno Quiao Mariscal, Romulo Calibo Soria, Pablito Agravante Elorcha ug Glenn Torres Judilla, nga pulos taga General Santos City.

Gibutyag ni Cotabato Provincial Police Office Director Colonel Henry Villar nga nakadawat sila og taho nga dunay ipalusot nga smuggled cigarettes hinungdan nga nagmuntar gilayon ang CPPO og surprisang checkpoint ug uban pang yunit sa kapulisan sa utlanan sa Barangay Old Bulatukan, Makilala.

Sa dihang miagi na ang 6-wheeler truck nga gisakyan sa mga suspek didto na sila gipangdakop.

Giukay dayon ang trak sa mga pulis ug nadiskubre ang mga esmagol nga mga sigarilyo nga kantidad og P5 milyones.

Gawas sa mga ilegal nga sigarilyo, nakuha sab ang usa ka kalibre .45 nga pistola, magasin ug mga buhing bala.

Giingon nga ang trak gikan sa Davao del Sur ug paingon sa General Santos City.