Nakatakdang mobalik ang aksyon sa Maharlika Pilipinas Basketball League (MPBL) pinaagi sa usa ka invitational tournament nga sugdan karong Disyembre 11, 2021 diin ang Mall of Asia Arena maoy posibleng venue.
Gibutyag ni MPBL Commissioner Kenneth Duremdes kagahapon nga 22 ka teams ang kompirmadong mosalmot sa kompetisyon.
“Matagal nang gusto ng mga team owners na mag-resume tayo, pero hindi pwede. Pero this is the right time, I think,” asoy ni Duremdes sa Philippine Sportswriters Association (PSA) Forum nga napatik sa www.abs-cbnnews.com.
“We have 22 teams na magpa-participate. And hopefully, ma-confirm namin ‘yung venue namin, which is MOA Arena, for the December 11 opening.”
Ang Chooks-to-Go Pilipinas maoy gitahasan sa founder sa MPBL nga si Sen. Manny Pacquiao nga maoy mopadagan sa operasyon sa liga.
Sa invitational tournament, ang MPBL dili una mosunod sa ilang tradisyunal nga home-and-away format.
Ang rota sa mga magduduwa ug coaches atol sa kompetisyon mao ang balay ngadto sa venue ug balik.
Ang 22 ka teams tungaon sa upat ka mga grupo diin ipatuman ang single round-robin format matag grupo.
Ang mopatigbabaw nga duha matag grupo mao ang makaabante sa knockout quarter-finals.
“Ngayon, subukan natin ‘yung FIBA tournament for this invitational, FIBA-type. Four groups, parang single round robin, top two of each group, parang ganoon ang initial na meeting namin,” pasabot ni Duremdes.
“Parang FIBA tournament talaga siya na ‘pag nanalo ka, you move, and every day ‘yung game, Mondays to Sundays.”