Daghan ang wala makatagna sa resulta sa drama sa politika sa kaulohan. Daghan ang nanglipaghong sa dihang gibalita nga posible nga magkakontra sa politika ang amahan nga Pres. Rodrigo Roa Duterte (PRRD) ug ang anak (Inday Sara) sa sambunot sa pagka-bise presidente.
Apil na niini ang tagna-tagna kon unsa gyod nga posisyon ang daganan ni Inday Sara, pagka-presidente o bise presidente lang. Migawas nga sukwahi sa gituhoan sa uban, pagka-senador lang ang gidaganan ni PRRD og dili gyod sila magka-kontra sa iyang anak.
Sa bahin ni Inday Sara, migawas nga pagka-bise presidente lang ang iyang gidaganan. Sukwahi kini sa mga balita nga dili molansad si Inday Sara sa bisan unsa nga posisyon sa nasyonal, kay kuno, magpapili lang siya pagka-mayor sa Davao.
Bisan si City Admin Atty. Floro Casas misulti nga dili molansad si Inday Sara sa bisan unsang posisyon sa nasyonal, ug walay ‘surprises’ nga mahitabo. Hasta ang iyang mga dumadapig clue-less sab kay matod pa, wa pay klaro kon unsa gyod ang daganan ni Inday Sara.
Nganong daghan man ang nagsunod sa maong drama nga kon hunahunaon, naa na may daghang milansad pagka-presidente?
Una, si Inday Sara kanunay nag-una sa surveys.
Ikaduha, daghan ang nagtuo nga dako kaayo og puruhan nga modaog si Inday Sara kon molansad siya pagka-presidente.
Ikatulo, nasayod ang katawhan nga basta piniliay, daghan gyong gimmick ang mahitabo, susama sa gimmick ni PRRD kaniadto nga misulti nga di siya molansad pero milansad diay.
* * *
Kon ang usa ka gobernador mopagawas og kamandoan kabahin sa mga kalihokan sa probinsiya, no problem. Apil na sa iyang gahom.
Apan kon ang gobernador momando na sa mga kalihokan sa mga ahensiya sa kagamhanang nasyonal, ah, dakong problema na kana.
Susama sa mando nga dili sila pahimuon og mga kalihokan nga dili siya pahibaw-on. Dili sila palakwon sa ilang mga naandang mga lakaw sa probinsiya gawas kon anaa siya personal sa maong kalihokan. Dili sila pahimuon og mga turn-overs o pagpanghatag sa mga ayuda gawas kon anaa siya.
Klaro kaayo ang tumong sa gobernador.
Gusto niya kontrolon ang tanang mga kalihokan sa probinsiya, apil na ang mga kalihokan sa mga opisina nga dili niya sakop sama sa mga opisina nasyonal.
Ngano man?
Aron gamiton niya sa pamolitika.