Mokabat na sa 30.5 ka milyon nga mga Pilipino ang nakompleto na sa ilang bakuna batok sa Covid-19. Nagrepresentar kini sa 39.5 porsyento sa adult target population sa tibuok nasod. Kinahanglan nga moabot sa 70 porsyento sa target population ang mabakunahan aron makab-ot ang herd immunity.
Kon duna nay herd immunity, mahibalik na kita sa atong naandan nga mga gimbuhaton ug mga kalihokan. Back to normal na ta. Apan unsaon man nato pagkab-ot sa herd immunity kon daghan gihapon ang di magpabakuna?
Sa atong nang nasulat ning atong lindog, ang Republic Act No. 11525, ang Covid-19 Vaccination Act of 2021, wa maghimong rikisito sa bakuna batok sa Covid-19 alang sa pagtrabaho. Ang Covid-19 vaccination card wa kinahanglana kon mo-apply ka og trabaho.
Apan kon duna ka nay trabaho mapugos ka ba sa pagpabakuna? Ang tubag dili. Di ka mataktak sa trabaho kon di ka magpabakuna hangtod nga di maamendar ang balaod. Apan mahimo bang di ka patrabahuon?
Sugod sa Disyembre 1, ang gobyerno nagmando nga kinahanglan nga magpabakuna ang tanang mga empleyado nga eligible sa bakuna kon anaa sila sa “on-site work” sa tanang mga buhatan sa gobyerno ug pribado sa mga lugar nga dunay igong supply sa bakuna.
Matod pa ni Presidential Spokesperson Harry Roque giaprobahan na kini sa Inter-Agency Task Force for the Management of Infectious Diseases (IATF) atol sa ilang panagtagbo niadtong miaging Huwebes.
Sa ato nang giingon, di mahimong taktakon sa trabaho kadtong wa magpabakuna. Apan kon naa sila sa on-site work, kinahanglang moagi sila sa regular nga RT-PCR testing o antigen tests. Dugang niini, ang mga kawani mao ang mogasto.
Kinahanglan usab nga nabakunahan batok sa Covid-19 ang tanang mga kawani sa public transportation services sa kadalanan, tren, mga barko ug eroplano aron magpadayon ang ilang operasyon.
Matod pa ni Roque ang mga buhatan sa gobyerno ug pribado mahimong di mopasulod ug di moserbisyo sa mga tawo nga wa mabakunahi bisan pa kon eligible sila sa bakuna. Apan ang mga frontline ug emergency services magpadayon sa pagserbisyo sa tanang mga tawo, di igsapayan kon nabakunahan o wa.
Matod pa ni Roque giawhag ang mga local government units (LGUs) sa pagluwat og mga mando ug pagpasar og mga ordinansa nga maghatag og incentives sa mga tawo nga kompleto na sa bakuna.
Dinhi sa syudad sa Sugbo ug sa Mandaue, dunay mga establisimento nga mopasulod sa mga tawo kon kompleto na sa bakuna. Ang face shield wagtangon na. Ayaw ilabay kay magamit kon magprito o mag-abodo ka.