Ang pulitika sama sa teleserye, tugob sa kulbahinam ug mga surprisa. Ang mga gumunhap ug mga tanghaga niining miaging mga adlaw nga nakahatag og kalibog sa katawhan, natubag na niadtong Lunes, Nobiyembre 15, nga deadline sa pagsibog ug substitution sa mga kandidato nga gustong magpapili sa sunod tuig nga eleksiyon.
Tuod man dihay mga surprisa sa mga kandidato nga wala pa makadesisyon niadtong deadline sa pag-file sa certificate of candidacy (COC) niadtong Oktubre 8.
Ang kalibog ug kontrobersiya tali nila ni Presidente Duterte ug sa anak niini nga si Inday Sara, nga gihugonhugon nga magtigi sa pagka bise presidente, wala gyud mahinayon. Kini human si Digong wala modayon sa pagdagan sa samang posisyon.
Hinuon, si Digong milansar sa pagka-senador nga gika-surprisa usab sa iyang mga sumosunod. Maayo kay wala mahinayon ang panagsangka sa amahan ug anak gumikan kay dili maayo tan-awon sa mga mata sa publiko ang ilang panag-engkuwentro. Gawas pa, kuwestiyonable man god kon molansar si Digong isip bise kay daghang mga legal opinion nga unconstitutional kini.
Pero sa ilang paglibog sa katawhan sa ilang stratihiya, daghan ang wala maka-uyon. Nganong wala naman lang sila magklaro sukad sa sinugdanan nga mao kanay ilang plano? Buot bang ipasabot nga wala sila makapangandam ug orada-orada ang ilang desisyon? Nganong libugon pa man god ang katawhan nga mao ra man gihapon ang ending. Way lami ang ending sa ilang drama.
Unsa kaha ang tumong ni Digong nga milansar man siya sa pagka-senador. Aron lang magpabilin siya sa gahum ug dili basta-basta nga matandog sa posibleng daghang mga kaso nga iyang paga-atubangon human siya mokanaug sa gahum? Proteksiyon lang sa iyang kaugalingon kining iyang pagahimoon? Unsa man goy mahimo niya isip senador? Wala nay gahum ang senador.
Aron makalikay si Digong sa magpungasi nga mga kaso, mangampaniya siya og maayo aron modaug si Senador Bong Go sa pagka-presidente ug si Inday Sara sa pagka-bise presidente aron malibre siya. Kay kon si Leni Robredo ang modaug, aw, priso gyud siya. Morag makabawos gyud niya si Senador Leila Delima.