Inay nga magpapili pagka-gobernador sa Lalawigan sa Sugbo, si Pinamungajan Mayor Dra. Geraldine ‘Gaye’ Yapha mipahibawo nga mas iyang gihatagan og bili ang pagsuporta sa kandidatura ni presidential aspirant, Senador Emmanuel ‘Manny’ Pacquiao.
Kini human nga wa mopatim-aw si Yapha sa buhatan sa Commission on Election (Comelec) sa Cebu Province atol niadtong katapusang adlaw, Nobiyembre 15 alang sa withdrawal ug substitution sa kandidato alang sa May 2022 election.
Nasayran nga si Mayor Yapha gisaligan ni Pacquiao nga mokandidato pagka-gobernador sa Probinsiya sa Sugbo, ubos sa partidong Abag Promdi.
Si Yapha maoy gikataho nga substitute candidate sa dihang mi-withdraw sa iyang kandidatura si Martin Mari Lozada.
Sa giluwatan nga pamahayag ni Yapha siya mipasalamat sa encouragement ug kumpiyansa ni Pacquiao sa iyang kapasidad sa pagserbisyo sa lalawigan.
“We have collectively come to a decision to set aside my political plans in order to focus and prioritize the journey of bringing one of our own, a true Cebuano, from Barangay Guimbawian, Pinamungajan to become the leader of our country,” matod ni Yapha.
Apan mas gipili ni Yapha nga mopaluyo sa kampaniya ni Pacquiao ug iyang gihikling ang tinguha nga magpapili pagka-gobernador sa lalawigan sa Sugbo.
“This journey is not about me but all about Sen. Manny Pacquiao. I believe for genuine change to happen in this country, we need a leader who is God fearing with integrity and a heart for the people,” saysay ni Yapha.