Cong. Pablo John way kontra

Nagbinugtong nga kandidato sa pagka kongresista sa tersero distrito sa umaabot nga piniliay sa Mayo 2022 si re-electionist ug incumbent Congressman Pablo John Garcia.

Si Garcia ubos sa partido sa National Unity Party (NUP) samtang One Cebu maoy iyang local party.

Kini human nga ni-withdraw ang iyang kaatbang nga si Anton Pono sa partidong Abag Promdi atol sa deadline nga gitakda sa Commission on Election (Comelec) niadtong Lunes, Nobiyembre 15, 2021.

Matod pa sa kongresista nga nahupay siya ug gitugotan pa gihapon siya sa kahigayonan nga makaserbisyo og balik sa third district sa Lalawigan sa Sugbo.

Mapasalamaton si Garcia nga sa kasaysayan sa politika sa tersero distrito siyay labing unang kandidato nga nagpapili nga way kontra.

“This is a blessing and I thank God for it. And personally, after five bruising campaigns in the past 15 years, this comes as a relief,” reaksiyon ni Garcia.

Subay sa naghinangat nga pinili-ay mas makahatag siya og igong panahon nga makatabang ngadto sa ubang kandidato sa One Cebu party, ilabi na nga siyaymaoy secretary general.

“This also gives me time to work hard for the victory of all candidates of One Cebu,” pamahayag ni Garcia.

Saad sa kongresista nga sa gipakitang pagsalig sa taga-tersero distrito iya kining suklian og serbisyo.

Aron pormal nga madeklarar ang iyang kadaugan, gipahibawo sa Comelec nga nagkinahanglan lang og usa ka boto si Garcia.

Si Garcia nahimong kongresista sa third district sa Sugbo sukad niadtong 2007 ug niadtong Hulyo 2019 napili siya nga Deputy Speaker sa 18th Congress.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph