GINANG ug giingong iyang kabit nga Indian national nga tigpatanto naaktuhan sa bana nga overseas foreign worker (OFW) ug mga pulis sa alas 11:30 sa gabii sulod sa kwarto sa usa ka balay sa North Poblacion, dakbayan sa Naga.
Sila si Ellen (di tinuod nga ngan), 49, taga lungsod sa San Fernando, ug si Red (di tinuod niyang ngan), 26, Indian national, gipangdakop ug gipangpriso sa City of Naga Police Station.
Ang duha gireklamo sa bana nga si Miguel (di tinuod niyang ngan), 58, kinsa nangayog panabang sa kapulisan human niya masuta nga ang iyang asawa naa sa balay nga giabangan ni Red sa Brgy. North Poblacion.
Si Police Staff Sgt. Organe Lungtad sa Naga Police Station nga nahinabi sa Superbalita Cebu nagkanayon nga si Miguel nangayog abag sa ilang buhatan human nahibaw-an niya nga didto matulog sa balay sa iyang kabit.
Sa pag-abot sa kapulisan sa Naga uban ang Special Weapons and Tactics, gisud nila ni Miguel ug mga pulis ang lawak, diin naaktuhan nga nag sexual intercourse ang duha.
NGANONG NAKABANTAY
Si Police Master Sgt. Jake Catane, imbestigador sa Naga Police Station nga nahinabi sa Superbalita Cebu nagkanayon nga ang asawa nagluhod-luhod sa pagpangayog pasaylo.
Matod ni Catane nga si Miguel niabot sa Sugbo niadtong Septiyembre gikan sa Saudi Arabia diin siya nagtrabaho isip backhoe operator.
Nabantayan ni Miguel nga ang iyang asawa kanunay molakaw nga unta naabot na man siya.
“Dili na niya modulog didto sa ilang panimalay, maglikaylikay na. Pasangil daghang lakaw,” dugang ni Catane.
Unya nananghid kini kaniya niadtong Nobiyembre 4 nga mopauli sa Mindanao kay dunay asikasuhon.
Wala siya paubana ni Ellen kay aron siya makalahoslahos sa iyang mga tuyo.
Ang duha ka mga kolektor ni Red maoy nisumbong kang Miguel nga sila si Ellen ug ang langyaw dunay relasyon.
“Mipiyaet ang duha ka kolektor nga Pinoy, mitug-an sa bana kabahin sa binuhatan sa iyang asawa maong nasakpan,”sumala ni Catane.
Ang duha ka mga kolektor nakabantay kanila ni Ellen ug Red nga nagsusyo sa lending ug pwerte ka sweet sa duha.
Ang mga kolektor nisulti kang Miguel nga si Ellen sa wala pa molarga sa Mindanao natulog og usa ka gabii sa balay sa Indian national.
Gumikan niini, gipanid-an nila ang balay niadtong Martes ug didto nakompirmar nga ang ginang didto niuli sa balay ni Red, wala sa San Fernando.
“Sige gihapon siyag limud nga sila dunay relasyon. Unya nagsigeg hilak, nangayog pasaylo sa bana. Unya desidido man ang bana nga mopasakag kasong adultery,” matod ni Catane.
Ang relasyon sa duha giingong nagsugod niadtong Agusto ning tuiga.
Si Red nag-abang sa apartment sa magtiayong Ellen ug Miguel apan kalit nga nibalhin pagpuyo ang langyaw sa dakbayan sa Naga.
Ang asawa nirason nga kasosyo lang sila ni Red sa lending.
Si Miguael gihulagway nga buotan, nakapundar sa pagtrabaho sa Saudi Arabia, nakapaeskwela sa ilang tulo ka mga anak nga dagko na.