"Human sa pag-file ni Mayor Sara Duterte-Carpio nga hulip ni Lyle Uy sa pagka-bise presidente sa partidong Lakas-CMD sa umaabot nga eleksiyon 2022, nagbagulbol si Presidente Rodrigo Duterte kay dili siya uyon nga bise presidente lang ang daganan sa iyang anak nga nag-una sa mga survey nga nagustuhan sa katawhan nga mopuli pagka-presidente sa moabot nga eleksiyon."
MAAYONG adlaw mga Super Suki. Malinawon na ba mo nga human na ang deadline sa substitusyon sa mga kandidato?
Sa laing bahin, luag na ba sab ang inyong pagginhawa sa mga kausaban sa mga tulumanon aron ta makalikay sa Covid-19 virus?
Mga pagbagulbol ato gihapon nga madungog, ang kahigwaos sa katawhan nagapadayon kalabot sa pandemiya ug sa umaabot nga eleksiyon.
Mga ginikanan nga pagsugod sa lockdown nikalampag kay gusto mogawas, bagulbol gihapon nga gipaluagan na ang mga health protocols.
Dili na sab gusto molaag kay naglikay sa gasto kay kulit ang mga bata, bisan unsa lang ang pangayuon.
Human sa pag-file ni Mayor Sara Duterte-Carpio nga hulip ni Lyle Uy sa pagka-bise presidente sa partidong Lakas-CMD sa umaabot nga eleksiyon 2022, nagbagulbol si Presidente Rodrigo Duterte kay dili siya uyon nga bise presidente lang ang daganan sa iyang anak nga nag-una sa mga survey nga nagustuhan sa katawhan nga mopuli pagka-presidente sa moabot nga eleksiyon.
Nikaransa ang amahan kay iyang atbangan ang iyang kaugalingon nga anak kay dili siya pabor nga mahimong ubos siya ni Bongbong Marcos.
Gipa-withdraw kang Senador Christopher Bong Go ang iyang kandidatura pagka-bise presidente ug gipa-file pagka-presidente sa partido Pedralismo ng Dugong Dakilang Samahan (PDDS) nga nakasamot paglugaw sa umaabot nga eleksiyon.
Dunay mga poster nga nagpakita ug mga hungihong nga si Bong Go kuno ang presidete ni Mayor Sara dili si Marcos, si Presidente Digong dili sab kuno mosuporta kang Bongbong.
Hilabihan ang kalandrakas sa dagan sa eleksiyon sa atong nasud tungod sa sistema sa panggobyerno nga pagkadaghan nga political party ang gitugotan.
Mas lisud pa gani sa usa ka aplikante pagka-security guard nga madawat tungod sa mga requirements kay sa mag-kandidato pagka- presidente sa nasud, basta makasulat ug makabasa ra ka, payts na! Ma-presidente na ka.
Daghan man unta ang mga congressmen ug mga senador sa atong nasud, nganong wa may nangahas pagpasaka og balaod nga bag-ohon ang mga batakan sa pagpili sa mga kandidato labi na sa pinakataas nga posisyon sa gobyerno sa nasud o mga balaod sa eleksiyon.