GILAMAYAN na ang usa ka abogado samtang laing 13 pa nga mga kauban ang naangol human madisgrasya ang gilulanan nilang sakyanan sa Bureau of Fire Protection (BFP) sa Bangsamoro Autonomous Region in Muslim Mindanao (Barmm) alas 8:50 sa gabii, Martes, Nobiyembre 16,2021, didto sa Alamada, Cotabato Province.
Ang namatay giila nga si Attorney Minerva Sacar-Guiling sa Commission on Audit (COA-Barmm)ug molupyo sa Cotabato City, samtang ang 13 ka mga kauban niini nga naangol sakop sa BFP-Barmm Inspection Team.
Sumala kang Cotabato Provincial Police Office Director Colonel Henry Villar nga sakay ang mga biktima sa mini-bus sa BFP-Barmm gikan sa Wao, Lanao del Sur paingon unta sa Cotabato City.
Apan pag-abot nila sa Barangay Barangiran, Alamada kalit lang nga nawad-an og preno ang sakyanan ug wala na makontrola sa drayber ang manobela hinungdan nga diretso kining nahulog sa lawom nga pangpang.
Abtik nga nagresponde ang mga molupyo sa dapit ug gitabang ang mga biktima.
Gideklara nga dead on arrival si Guiling sa doktor sa Alamada District Hospital samtang ang 13 padayon pang nagpaalim sa ilang mga bun-og, pangos ug samad nga naangkon. (Edgar E. Fuerzas)