NAHIMONG sumsuman ug gikonsiderang "missing in action" ang kandidato nga nagpapili sa pagka-bise gobernador sa Davao de Oro kinsa gituohang mo-withdraw unta sa iyang kandidatora aron maka-substitute ang kauban sa grupo nga mohulip unta sa posisyon nga iyang gi-file.
Giingong niadtong Lunes, Nobyembre 15, 2021, malaumon ang mga kapartido ni Alexander Petalcorin Agustin nga mopatim-aw kini sa opisina sa Commission on Election (Comelec-DDO) aron i-withdraw ang kandidatora pagka-bise gobernador ug maoy mohulip ang kapartido nga si Franco Tito nga unang mi-file pagka-gobernador apan mi-withdraw sab aron maoy mag-bise gobernador.
Sumala pa nga wa miabot ug wa mipatim-aw si Agustin aron i-withdraw ang iyang kandidatora rason nga naung-ong sa buhatan sa Comelec ang certificate of candidacy (COC) ni Tito sa pagka-bise gobernador.
Giingong nanggawas ang mga istorya nga nabayran si Agustin mao nga wa mi-withdraw sa iyang COC sa pagka-bise gobernador.
Apan niadtong Martes, Nobyembre 16, 2021, si Agustin nagklaro sa Superbalita dihang nahinabi pinaagi sa messenger nga dili tinuod nga siya nabayran.
"Nidagan ko tungod kay gusto ko moalagad sa katawhan sa Davao De Oro," pagtin-aw ni Agustin.
"Wala ko nag-file sa pagka-vice gobernador para pulihan lamang. Naa ko sariling programa ug adbokasiya nga ginadala nga puwede nako ikatabang sa katawhan sa Davao De Oro kung ako mabotaran isip vice gov. sa probinsiya," puno pa sa kandidato.
"I am an independent-minded person. I don't want to be in conflict with the interest of Reporma... and I don't want to be influenced by them also."
Gawas sa gihimong pakighinabi, nagpagawas usab og video sa social media si Agustin nga nagklaro nga dili siya magpa-substitute maskin kinsa sa posisyon nga iyang gidaganan.
Tungod niini, dakong purohan nga mapakyas ang pagdagan ni Tito sa pagka-bise gobernador.
Gisulti ni Agustin nga huwaton na lang usa ang mahimong pinal nga desisyon sa Comelec samtang siya magpaabot sa period of campaign una hingpit siyang mopatim-aw sa katawhan ning probinsiya.