Nagpista na sad ang social media sa pagpakasal nilang Ellen Adarna ug Derek Ramsay. Ang duha nagkaila lang niadtong Enero karong tuiga ug parehong naila sa mabulukon nilang mga lovelife sa una. Maapil kaha sila sa listahan nga dunay "Shortest Marriage Of All Time" sa showbiz? Kinsa ba ang mga local showbiz couple nga wa abtig pila ka buwan human sa kasal nagbuwag ra dayon. Basaha kon kinsa ni sila...

AI-AI DELAS ALAS - JED SALANG

(29 days) / fashionpulis

Gikumpirmar ni Ai-Ai delas Alas sa May 19, 2013 episode sa The Buzz nga nagbuwag na sila ni Jed Salang. Mao ni iyang ikaduhang kaminyuon human sa aktor nga si Miguel Vera. Si Ai-Ai ug Jed nga mas bata niya og 20 katuig nakasal sa Las Vegas Abril 3, 2013 ug nagbuwag sad dayon pag-Mayo 2, 2013. Ang rason ni Ai-Ai nga dunay laing babaye si Jed ug sa iyang pagka-battered wife.

PILAR PILAPIL-MICHEL PONTI

(2 months) / instagram

Ang Cebuana beauty queen-aktres nga si Pilar Pilapil unang nakasal sa Spanish journalist nga si Michel Ponti nga mas bata niya og 14 katuig niadtong Oktubre 12, 1986 sa Manila Cathedral. Apan base sa kulom ni anhing Ricky Lo nga napatik niadtong Marso 2002 nga nilanat rag duha ka buwan ang maong kaminyuon tungod sa incompatibility. Si Pilar nakasal pag-usab 2002 sa kauban niyang pastor sa Sugbo nga halos pareho ra og edad sa iyang unica hija nga si Pia Pilapil.

DEREK RAMSAY-MARY CHRISTINE JOLLY

(5 months) / pep.ph

Base sa taho sa Pep.ph si Derek Ramsay ug Fil-Indian model nga si Mary Christine Jolly nakasal sa civil niadtong April 2002 apan nagbuwag sab dayon pag-September 2002. Mao sad ning tuiga nauyab ni Derek si Solenn Heussaff. Nabulgar ang kagahapon ni Derek kang Jolly dihang nisang-at og kaso si Jolly batok sa aktor niadtong 2014 ug nidemanda og financial support alang sa ilang anak.

SNOOKY SERNA-NIÑO MENDOZA

(5 months) / instagram

Si Snooky nakasal sa civil ceremony sa Blue Jean Junkies lead singer Niño Mendoza niadtong Mayo 2006, upat ka buwan human na-annul ang iyang civil wedding ni Ricardo Cepeda. Apan paglabay sa lima ka buwan mideklarar si Snooky sa interbyu sa 24 Oras sa GMA nga gusto na niya ning ipa-annul sa rason nga kasal pa gihapon siya ni Cepeda sa simbahan. Ang karelasyon karon ni Snooky ang kanhi vice governor sa Bulacan.

BERNARD PALANCA

- MERRYL SORIANO

(5 months) / pep.ph

Base sa record sa ABS-CBN si Bernard Palanca ug Merryl Soriano nakasal September 8, 2006 ug nagbuwag human sa lima ka buwan samtang nagsabak niadto ang aktres sa ilang anak nga si Elijah. Si Soriano nisang-at og annulment 2011 nga giaprobahan sa korte pag-2015. Si Merryl duna say anak sa aktor nga si Joem Bascon nga mag-one year old karong Enero.

WENDY VALDEZ-BRUCE QUEBRAL

(6 months) / pep.ph

Nagkauyab si Wendy Valdez ug Bruce Quebral isip housemates sa Pinoy Big Brother Season 2 niadtong 2007. Sa November 22, 2009 live episode sa The Buzz niangkon si Wendy nga nakasal sila sa civil ug nagbuwag paglabay sa pila ka buwan human sila nakaamgo nga dili pa sila andam sa kinabuhing minyo. Na-annul ang ilang kasal niadtong 2012.

KRISTINE HERMOSA- DIETHER OCAMPO

(6 months) / GMA-7

Si Diether Ocampo ug Kristine Hermosa nagpa-secret married Sept. 21, 2004 sa Nueva Ecija. Apan pag-June 21, 2005 nisang-at si Kristine og annulment sa rason nga wala silay nadawat nga marriage certificate. Niadtong Pebrero 2009 gipaboran sa korte ang ilang annulment. Si Kristine ug Oyo Boy Sotto nakasal sa simbahan Enero 2011 samtang si Diether single gihapon hangtod karon.