KAPULISAN sa dakbayan sa Sugbo magpaabot og direktiba sa Emergency Operations Center kon kanus-a ipatuman ang pagdili sa mga bata pagpasulod sa mga mall human mimando si President Rodrigo Duterte nga did-an lang una ang mga ginikanan nga makadala sa ilang anak sa mall.
Matod ni Police Lieutenant Colonel Wilbert Parilla, deputy city director for operations sa Cebu City Police Office, nga magpaabot sila sa direktiba sa EOC.
Dugang ni Parilla nga sakto nga idili lang una sa mga bata ang pagpasulod kanila sa malls gumikan kay naghatag kinig peligro sa ilang kinabuhi sanglit wala pa sila mabakunahi.
Kasagaran usab kanila walay mga face mask itandi sa mga nag edad og 12 anyos pataas nga aduna nay pamuot nga nakasabot na nga mahinungdanon nga mag facemask tungod kay mamahimo sila nga matakdan sa virus.
“Atong makita man gud, risgo gyud kaayo sa mga bata considering ang bata usually kining mga toddler, dili gyud ni magsul-ob og facemask,” matod ni Parilla.
Samtang mahimo pa nga makasulod ang gagmayng bata sa mall nanawagan ang kapulisan sa mga ginikanan nga sa pagkakaron nga naa pa ang Covid dili lang una nila dalhon ang ilang mga anak.
Gipanglantawan sa CCPO nga modaghan ang tawo sa mga suroyanan sa dakbayan sa Sugbo ning nagkaduol na ang Pasko tungod kay tingdawat na usab sa Christmas bonus ug daghang kwarta ang mga tawo.
Tungod niini, nipahimangno sila nga dili angay nga mokompyansa, basin mosaka ang mga kaso sa Covid ug dili sila makatugot nga mobalik og lockdown ang Dakbayan sa Sugbo ug mahimong masulob-on na hinuon ang pagsaulog sa Pasko ug Sinulog.
“Moabot nasad ang bonus so daghan na gyud kaayo ang mogawas mao nang atong gipanawagan nga dili sa ta mokompyansa kay basin unya og sa umaabot na hinuon nga Pasko, mag lockdown na hinuon ta kon modaghan og balik ang Covid,” dugang ni Parilla.
Gani usa sa mga rekomendasyon sa CCPO ngadto sa EOC nga dili lang una pasudlon sa mall ang wala pa mabakunahi aron masiguro nga luwas ang mga tawo nga manulod sa mga dagkong tindahan.
Samtang sa 278 ka imnanan nga gi inspeksyon sa miaging semana, 10 ang gi warningan tungod kay kasagaran wala pa manira bisan alas 11:30 na sa gabii.
Sigun sa gipagawas nga executive order ni Acting Cebu City Mayor Michael Rama nga kinahanglan sa dili pa moabot ang alas 11:30, manira na ang mga imnanan nunot sa pagpatuman sa curfew.