ANG Malacañang nimando nga did-an pagsulod sa malls ang mga bata nga nag-edad og 11 anyos pa-ubos. Kini human adunay daghang mga kaso sa Covid 19 sa kauluhan human gipaluagan ang restrictions ug gitugutan nga makagawas sa balay ang mga bata. Ang ubang local government units (LGUs) sama sa dakbayan sa Sugbo mitugot nga makagawas ang mga bata. Nanglumpayat intawon ang mga bata kay gawasnon na sila human mapriso og kapin sa usa ka tuig nunot sa pandemiya.

Apan nunot ning bag-ong kamanduan, hipos og balik ang kabataan. Ang kapulisan gimandoan nga did-an ang mga bata pagsulod sa malls. Ang mga security guard ug mall management mismo moimplementar niini. Gihimo kini sa Malacañang kay dili pa bakunado ang maong mga pangidaron ug wala pa silay proteksiyon batok sa Covid 19. Ang mabakunahan lamang mao ang mga nag-edad og 12 ngadto sa 17 anyos. Ang Philippine Pediatric Society kusganong misuporta niini.

Maayo baya kini kay ang mga bata daling matakbuyan og sakit kay huyang pa ang immune system. Pero ang dili nako masabtan nga samtang giestrikto sa kagamhanan ang pipila ka aspeto aron malikay ang katawhan, labi pa ang mga bata, gipaluagan hinuon ang ubang aspeto. Sama aning pagbukas sa limited face-to-face classes gikan sa kindergarten hangtod sa junior high school.

Ilang did-an ang mga bata sa malls apan gitugutan nga makaadto sa eskuwelahan. Lahi tuod ang situwasyon kay ang malls anaa sa urban areas. Samtang ang mga eskuwelahan nga diin gipahigayon ang face-to-face classes atoa sa kabukiran. Dili tuod crowded o daghang tawo ang mga eskuwelahan itandi sa malls.

Apan angay hinumduman nga kining maong mga bata nga motungha mosakay sila og public transportation sama sa mga tricycle ug habal-habal ingon man mga maestra. Kining ubang mga maestra magpuyo sa laing lugar, mosakay og bus inig report. Ang mga ginikanan aning mga bata mosuroy sa lungsod, mamalit sa merkado ug makig-interact sa ubang mga tawo. Simbako og matakbuyan sila ug madala sa ilang panimalay ug matakdan ang mga bata ug madala sa eskuwelahan, di ba dakong perdisyon?