MGA bag-ong political party nanuyhakaw karon nga maoy gipasilungan sa atong mga pulitiko nga molansar sa umaabut nga eleksiyon sa Mayo 9, sunod tuig. Wala na gamita ang karaang major political parties sama sa Liberal, Nacionalista, KBL, PDP-Laban ug uban pa.
Dili kita parehas sa ubang mga nasud sama sa Estadus Unidos (US) nga lig-on kaayo ang ilang two-party system diin gamhanan kaayo ang Democratic Party ug Republican Party. Naa sab hinuon silay minor parties sama sa Reform, Libertarian, Socialist, Natural Law, Constitution ug Green. Maka-promote kinig kandidato panahon sa presidential elections. Sa United Kingdom (UK) ang dominant nila mao ang Conservative Party ug Labour Party. Pasagdi nalang ang People’s Republic of China kay One-Party State sila ubos sa liderato sa Communist Party of China (CPC). Duna sab silay mga minor nga non-communist parties.
Ang atong mga kandidato sa pagka-presidente sa sunod tuig nga piniliay ug ang ilang nagkalidades nga partidong Tagalog nga murag chopsuey mao ang musonud: Bongbong Marcos – Partido Federal ng Pilipinas; Bong Go – Pederalismo ng Dugong Dakilang Samahan; Ping Lacson – Partido sa Demokratikong Reporma; Isko Moreno – Aksyon Demokratiko; Manny Pacquiao – Probinsiya Muna Development Initiative (PROMDI); ug Leni Robredo – Independent. Daghang nahibung nganong nag-independente siya nga midaug man siya pagka-bise presidente ubos sa Liberal Party.
Ang mga botante kinahanglang mopili pag-ayo sa ilang kandidato gikan sa nagkalandrakas nga partido sama sa magpili kag sagol sa chopsuey nga buot nimong kan-on.
Nganong nausab man ang mga pamahayag ni Presidente Rodrigo Duterte kalabot kang Bongbong Marcos ug sa iyang anak, Mayor Sara Duterte Carpio? Kaniadto gud, nga nagsige pa ang lantugi sa electoral protest ni Marcos batok kang Leni Robredo, kanunay nga gibalik sa Presidente nga kon si Marcos maoy iyang bise presidente andam siyang mo-resign. Masabut nimo nga nagpasalamat si Duterte sa utang kabubot-un sa ilang pamilya sa amahan ni Bongbong.
Karong bag-o, nasuko si Digong kang Bongbong kay gikumbensir kuno niini si Inday Sara nga modagan lang pagka-bise presidente. Gusto sa amahan nga presidente maoy daganan sa anak tungod kay mas taas kuno kinig rating sa mga survey kay sa kang Bongbong. Apan dili ba si Presidente Duterte raman ang mipahibawo sa publiko nga dili siya gustong modagan pagka-presidente si Inday Sara kay dili kuno angay sa usa ka babaye ang pagka-presidente kay gawas nga kapoy, daghan usab kuno og musaway. Unya nganong masuko man siya og bise presidente ray daganan sa iyang anak?
(mannyrabacal@gmail.com)