KARSADA nga dul-an usa ka kilometro nga nagdugtong sa duha ka mga bukirang barangay sa lungsod sa Dumanjug, lalawigan sa Sugbo nga gitrabaho sa 53rd Engineering Brigade Philippine Army hingpit na nga natapos.
Ang mga residente sa Barangay Cotcoton ug Bulyogan nag-antos sa kalisod pagtumod sa lungsod sa ilang mga abot sa uma tungod kay lisud ang ilang agianan.
Gani bisan ang kabaw dili makasugakod tungod sa ka batuon niini.
Apan karon nahimo kining sayon.
Si Kapitan Paciana Luab sa Barangay Cotcoton ug konsehal Gregorio Demol nga kanhi usab kapitan sa Barangay Bulyogan, nagpasalamat sa inisyatiba sa Visayas Command (Viscom) ug sa local nga kagamhanan sa lungsod sa Dumanjug nga gitubag ang ilang hangyo nga mahimoan silag karsada alang sa kasayon na sa pagdala sa ilang mga produkto sa umahan ngadto sa lungsod.
KALISDANAN
Matod ni Demol nga kaniadto nga wala pa silay karsada, maglisod sila sa pag tumod sa abot sa ilang uma tungod kay way sakyanan.
Usa pa niini nga kon adunay mamatay sa ilang barangay, ila kining tabangan sa pagpas-an paingon sa lungsod aron ilubong.
Apan karon nga gitakda na nga i-turnover ang proyekto ngadto sa lungsod mahimong hamugaway na ang ilang panginabuhian.
“Ang among buhaton diri kon adunay mamatay, mag dayong gyud mi didto sa ubos paatubang ngadto sa lungsod. Among gisakripisyo ang among kaugalingon paghatod sa among mga kaliwat nga naay mahitabo. Karon, dako kaayo kog pasalamat kay dunay kausaban dinhi sa among barangay sa Cotcoton ug Bulyogan nga nakasumpay ning maong programa,” matod ni Demol.
Si Nelson Mirafuentes, lumolupyo sa dapit, dako usab ang pasalamat tungod kay ang iyang anak nga nagtungha sa high school sa Barangay Bulyugan dili na mag antos sa pagbaktas tungod kay mamahimo na nga mosakay og habal-habal.
Kaniadto nga wala pa ang pandemic, maluoy siya niini ilabi na kon moulan tungod kay di kini makatungha tungod kay mabasa na samtang nagbaktas sa kapin tulo ka kilometro.
“Ang among mga estudyante tawon magkabasa-basa, murag dili na magkadimao inig abot sa eskwelahan kay lapok lagi kaayo,”matod niMirafuentes.
Si Lora Mae Alviola, municipal administrator sa Dumanjug, nitug-an nga dugay na kaayo nga reklamo sa mga residente sa duha ka barangay ang walay karsada tungod kay nag antos ang mga tinun-an nga magbaktas og tulo ka kilometro aron lang nga makatungha sa high school.
Tungod niini, nakig alayon ang munisipyo sa Visayas Command sanglit aduna may nagpadayon nga programa ang gobyerno nga mao ang Barangay Development Program sa National Task Force to End Local Communist Armed Conflict diin mohimo kinig proyekto alang niadtong mga dapit nga wala pa maabti og inprastraktura sama sa karsada ug patubig.
Sunod tuig, isunod nila ang pag semento niini pinaagi sa abag gikan sa pundo sa Department of Agriculture nga mobalor og P10 million sanglit ang karsada giila nga farm to market road nga kabahin usab sa mga programa sa DA.
Si Army Major Abner Sparcia sa 53rd Engineering Brigade nitug-an nga human sila maka dawat og komunikasyon sa mga opisyal sa lungsod sa Dumanjug ila dayon kini nga gisanong.
Sulod lang sa 10 ka adlaw, ilang natapos ang dul-an usa ka kilometro nga karsada.
Matod niya nga libre lang ang pagpagamit sa ilang mga heavy equipment sama sa backhoe ug bulldozer apan ang migasto sa krudo mao ang munisipyo na.
Pasabot usab ni Sparcia nga dako kaayo og ikatabang sa mga mag-uuma ang pundo sa NTF-ELCAC ilabi na niadtong mga dapit nga wala pa ma develop sama sa paghimog karsada ug kuryente nga maoy hinungdan nga dili angay kini nga wagtangon.