USA ka hot pursuit operation karon ang gihimo sa Digos City Police Office sa pagpusil-patay sa chairman sa Digos Padada Transport Cooperative.
Ang pagpamusil nahitabo alas 7:30 sa gabii niadtong Miyerkules didto sa Purok 9-A, Bonifacio Super Highway Street, Barangay Aplaya, Digos City.
Giila ang biktima nga si Ronald Batukael Sabandal, 50, minyo, chairman sa Digos Padada Transport Cooperative, ug residente sa Purok 9-A, Barangay Aplaya sa dakbayan.
Nasayran nga pauli na unta ang biktima padung sa ilang balay gikan sa trabaho niini sa opisina sa Digos Padada Transport Terminal sa Rizal Avenue, Barangay San Jose sa siyudad.
Kalit na lang gihunongan ang biktima sa naka-motor dayon gipusil tumong sa ulo nga miresulta sa hinanaling kamatayon sa biktima.
Dili pa matumbok sa kapulisan ang anggulo sa krimen diin sa kasamtangan padayon ang ilang gihimong imbestigasyon sa hitabo.