PADAYON nga gi-validate sa City Social Services and Development Office (CSWDO) sa Davao ang mga pangalan sa mga nasunogan sa Sto. Niño, Barangay 5-A, Bankerohan Huwebes sa buntag, Nobiyembre 18, 2021.
Gilayong miresponde ang Kusina ng Bayan sa CSWDO kaabag ang Barangay 5-A sa pagpahigayon og community cooking alang sa mga biktima sa sunog.
Sa impormasyon gikan sa awtoridad, alas 6:35 sa buntag nagsugod ang pag-ulbo sa kalayo sa Purok 17, diin gilayon kining mikanit sanglit gama sa mga light materials ug dikit-dikit ang mga balay.
Alas 10:10 na sa buntag gideklarang fire under control ang sunog. Walay nakabsan nga kinabuhi sa maong hitabo.
Wala pa giestablisar sa kabomberohan unsay hinungdan sa kalayo. Padayon ang ilang gihimong imbestigasyon sa insidente nga gikaugdaw sa dul-an 25 ka mga panimalay.