PADAYON ang pagnaog sa ihap sa mga bag-ong kaso sa Covid-19 sa Cagayan de Oro human kini mitala og unom ra ka kaso, matud sa report sa City Health Office Biyernes, Nobyembre 19, 2021.

Matud sa City Health Office, sa unom ka mga bag-ong kaso, usa ang local index nga kaso, usa ang lokal nga authorized person outside residence (Apor), usa ang person deprived of liberty (PDL), ug usa ang patay.

Sa pagkakaron, ang kinatibuk-ang ihap sa mga kumpirmadong kaso sa Covid-19 sa syudad anaa na sa 20,369.

Ang Cagayan de Oro adunay 266 ka mga active cases, 68 niini na-admit sa Northern Mindanao Medical Center ug uban pang mga ospital sa syudad, 197 ang mga outpatients, ug usa ang ROF/LSI.

Nakatala usab og 14 ka mga recoveries ang syudad. Anaa na karon sa 19,256 ang ihap sa mga nakarekober sa dakbayan.

Ang ihap sa mga namatay sa Covid-19 sa syudad anaa na sa 847.