TUNGOD sa grabeng pag-ulan, tulo ka mga dagkong suba ang miawas tungod sa pagtaas sa lebel sa tubig ug nakaapekto sa daghang mga barangay sa Pikit, North Cotabato.
Mga suba nga miawas mao ang Pulangi River, Rio Grande de Mindanao ug Liguasan Marsh tungod sab sa dakong bul-og sa baha gikan Bukidnon ug Agusan River. Kini midagayday sa probinsiya ug sa kasikbit nga Maguindanao Province nga giingong nahimo nang "catch basin" sa tubig, ilabi na sa mga ubos nga bahin.
Daghan nang mga molupyo sa Pikit ang mihikling paingon sa taas nga dapit gumikan kay gilunopan na ang ilang mga lugar.
Kahinumdoman nga usa ka bata nga nagpangedaron og usa ka tuig ang nahulog gikan sa atop sa ilang balay ug gianod sa baha sa Sitio Proper, Barangay Talitay sa maong lungsod.
Giingong misaka si Saguira Kadir Molina sa atop uban ang iyang anak gumikan gilunopan na ang ilang balay, apan aksidente nga nahulog ang biktima.
Nadala pa ang bata sa balay tambalanan, apan gideklara kining dead on arrival human malumos.
Sa kasamtangan, padayon ang rescue operation sa Municipal Disaster Risk Reduction and Management Office sa Pikit inabagan sa mga pulis ug sundalo sa mga pamilyang naipit sa baha.