GITAKDANG mopagawas ang lokal nga panggamhanan og mga sumbanan alang sa contact sports tungod kay ang Siyudad sa Davao naa na karon sa mas relaks nga Alert Level 2.
Si Davao City Sports Division Chief Mikey Aportadera nagsulti sa paghinabi kaniya sa radyo niadtong Huwebes, Nobyembre 18, nga ang ilang buhatan padayon pang nakigkoordinar uban sa Covid-19 Task Force bahin sa pagpatuman sa bag-ong mga sumbanan ug mekanismo alang sa contact sports aron nga maseguro ang mga kalihukan sa paugnat sa kusog di mahimong tigpakuyanap sa Covid-19.
Matud ni Aportadera nga ang mga giya gilauman nga mapagawas sa di madugay.
"If it is in the controlled and regulated area, for example, naay mga padula na the government and the organizer can somehow partner sa pagmanage ani pagpadagan ani nga event nga dili ta makapadaghan og mga cases sa Davao City. Mao na akong buot pasabot nga kaning depende asa nga venue," sumala sa opisyal sa paghinabi kaniya sa 87.5 FM Davao City Disaster Radio.
Subay sa Alert Level 2 nga mga probisyones, ang contact sports gitugtan ubos sa pagtugot sa lokal nga panggamhanan kon diin asa himuon ang mga duwa.
Ang mga sumbanan alang sa nasudnong pagpatuman sa Alert Level Systems alang sa Covid-19 Response sukad Nobyembre 11, nagtugot sa "Contact sports approved by the LGU where such games shall be held."
Kini nagpasabot nga ang pagbukas sa contact sports di otomatik ug kinahanglan nga mangayo pa og pagtugot sa LGU.
Bisan pa sa mga apela gikan sa mga atleta ug ubang mahiligon sa paugnat sa kusog, matud niya nga nagtakda sila og mga pamaagi alang niini kay basin og mahimo kining hinungdan sa pagtakod sa kagaw.
Gisulti sab ni Covid-19 Task Force Spokesperson Dr. Michelle Schlosser sa lahi nga paghinabi niadtong Biyernes, Nobyembre 19, nga kinahanglan nga dunay mga sumbanan sa paghimo sa contact sports tungod kay makonsidera kini nga "high risk" event kay ang pagsul-ob og face mask ug pagtuman sa physical distancing di na masunod.
Hinuon, ang mga sumbanan padayon pa nga gituki.
Ang Siyudad sa Davao ubos karon sa Alert Level 2 hangtud sa Nobyembre 30. (SunStar Davao)