GIAWHAG sa Land Transportation Office (LTO) Central Visayas ang mga tag-iya og motorsiklo ug four-wheeled vehicle nga i-claim ang ilang license plates sa temporary distribution office sa SM Seaside City Cebu.
Si LTO 7 Director Victor Emmanuel Caindic nitug-an sa mga tigbalita sa usa ka press conference sa Biyernes, Nobyembre 19 nga adunay 195, 341 ka mga plaka sa motorsiklo ug 81,910 ka mga plaka sa sakyanan nga wala pa ma-claim.
Sugod sa Nobiyembre 19 hangtod sa Nobiyembre 29, ang mga tag-iya og sakyanan mahimo na lang mag-walk-in ug mo-claim sa ilang mga plaka nga dili na magkinahanglan og appointment gikan sa LTO.
Gamit ang kanhi nilang pamaagi sa pag-roll out sa mga plaka, si Caindic niingon nga hinay kini ug sa inadlaw-adlaw nga average, anaa ra sa 15-20 ka indibidwal ang mokuha sa ilang mga plaka sa sakyanan.
Ang mga plaka nga magamit sa walk-in mao kadtong four-wheeled vehicles nga narehistro sa 2015 ug 2016. Samtang ang mga motorsiklo nga narehistro niadtong Enero hangtod Pebrero 2016 ug Enero hangtod Abril sa 2018 mahimo usab nga ma-claim. Para sa mga motorsiklo ug mga sakyanan nga wala maapil sa maong mga petsa, gikinahanglan ang appointment.
Si Caindic namahayag nga gisuwayan sa iyang buhatan paghimo og Memorandum of Agreement (MOA) tali sa mga motorcycle dealers aron mapadali ang pag-apod-apod sa mga plaka sa motorsiklo, apan daghan kanila ang wala mosuporta.
Ang kondisyon sa MOA nag-ingon nga ang mga dealer maoy responsable sa pagpahibawo ug pag-apod-apod sa plaka ngadto sa mga kliyente niini.
Apil usab nga kon adunay mga pasangil sa mga dealer nga mangolekta og dugang bayronon, ang LTO moapil sa imbestigasyon ug mohatag og tukmang disciplinary actions.
Dihang gipangutana kon unsay rason nganong di gustong mopirma sa kasabutan, igo lang mitubag si Caindic, “I cannot guess why they will not support the MOA.”
Gitubag usab ni Caindic ang mga isyu nga gilabay sa iyang buhatan bahin sa kakuwang ug pagkalangay sa pag-apod-apod sa mga plaka.
“Kon moingon sila nga wala’y mga plate, klaro namong mapakita nimo nga nag-awas-awas ang suplay sa wala ma-claim nga mga plaka,” matud ni Caindic sa mga tigbalita.
Nipasidaan usab ang LTO director nga sa Disyembre, posibleng dunay ipagawas nga direktiba nga magdugang og silot niadtong wala mo-claim sa ilang mga plaka.
“Alang sa mga sakyanan nga nasakpan sa mga tuig nga naa nay mga plaka, kon madakpan sila, ato silang pabayron sa wala pagkuha sa ilang mga plaka,” matod ni Caindic.
Aron ma-claim ang ilang plaka, ang mga tag-iya kinahanglan lang nga magdala og photocopy sa official receipt ug certificate of registration.