BARANGAY tanod nagpositibo sa drug test nga gipahigayon sa Cebu Office for Substance Abuse Prevention (Cosap) sa Huwebes sa Barangay Luz, Dakbayan sa Sugbo.
Matod ni Cosap head Jonah John Rodriguez nga nahinabi sa Superbalita Cebu nga subay sa gihatag kanila nga resulta sa Drug Check Phil’s Inc., sa 165 ka mga kawani ug opisyal sa barangay, usa ra ang nagpositibo.
“Usa ka tanod ang nagpositibo sa drug test but subject for confirmatory pa siya. Pero sa atong unang test, ang iyang ihi positive siya sa drugas. Tulo man atong panel that is shabu, ecstasy ug marijuana. So ang iya shabu,” pasabot ni Rodriguez.
Dugang ni Rodriguez nga duna pay mga worker sa Barangay Luz ang wala pa ma drug test kay wala makatambong, apan mopailawom pa gihapon sa drug test nga himuon sa Cosap.
Matod ni Rodriguez nga ang Cosap nagsugod na sa pagbalik sa pagpahigayon sa drug test sa tanang barangays ug buhatan sa kagamhanan.
Sukad gisugdan kini niadtong Oktubre, kapin na sa 10 ka barangay ang nipaubos sa drug test lakip na ang Barangay Mabolo, Pung-ol Sibugay ug uban pa.
Samtang anaa na usab sa 10 ka mga kawani sa barangay nipositibo sa drug test gikan sa Barangay Mabolo, Babag ug Barrio Luz.
Gipahibawo ni Rodriguez nga kabahin sa desisyon sa kon magpositibo nga mga kawani sa barangay, ang Cosap dili na niini manginlabot, naa sa barangay officials unsa ang ilang buhaton.