PAGSAULOG sa akong inahan sa iyang 80 anyos nga adlaw’ng natawhan, kami tanang managsuon nanghinuklog sa tanan niyang mga bulawanong tambag ug giya labi na niadtong mga panahon nga naa mi sa malisod nga kahimtang.
Usa sa kanunay niyang balikbalikon ang pulong nga kon madagma kay masipyat o madiskarel ang mga plano sa kinabuhi, barog og balik, pamaspas unya padayon og lakaw hangtod maabot sa gitakdang destinasyon.
Kini maoy among gihimong sumbanan labi na niadtong mga higayon nga nagkabikos-bikos mi sa among mga tulumanon pagpadako sa among mga anak.
Kining iyang ubang mga bulawanong tambag ug pahimangno ako sang ipaambit diri buwahan masuwayan sa mga ganahang mosunod.
‘Nobody is perfect,’ matod niya maong ayaw kahingawa kon mapakyas o masayop kay bisag ang kabaw nga upat ang tiil masayop man gali.
Palayo sa stress. Ayaw segi og kasuko o ka high-blood. Ayaw daginuta ang mga gagmay nga butang nga way bili o angay kasuk-an. Adto hinuon tutok sa kalinaw ug paghigugma labi na niadtong lisud higugmaon.
Angay kalimtan ang pait o bati nga kagahapon kay nahuman ug milabay naman to unya di na sab mabalik. Hinuon angay hinumduman ang leksyon nga nakuha o nakat-unan sa maanindot ug pait nga kasinatian.
Undangan na sab ang segi og pa impress sa uban kay kon buot hunahunaon wa ma na silay labot sa imong kinabuhi. Wa na sila nagpakaon o ba kaha nagbayad sa imong mga bayranan o utang maong ang ilang pagtan-aw, sulti o tambag way balor sa imong kinabuhi.
Palayo sa mga libakera ug mga hinawayon kay sa di madugay mag-unayay ra ni sila og away ug igo sa kaugalingong tari.
Palayo sab aning mga tawo nga kusog magyagayaga unya nagkaminus o mubo og pagtan-aw sa imong estado ug pagkatawo kay kini sila makapasamot sa kaluya imbis makapadasig para imong makab-ot imong mga damgo ug mithi.
Ayaw ikumparar ang imong kaugalingon sa uban kay sa gusto nimo o di, naa man gayo’y molabaw o ubos nimo.
Ang tanang panghitabo dunay rason busa ayaw pagmahay.