ANG mga mananagat sa Consolacion gustong makigsulti sa mga opisyal sa Bureau of Fisheries and Aquatic Resources (Bfar) aron ipadangat ang ilang mga kabalaka sa giplanong 235.80 ka ektarya nga Seafront reclamation project sa ilang lungsod.
Sa lahi nga pakighinabi, si Consolacion Mayor Joannes “Joyjoy”, siya niingon sa SunStar Cebu nga samtang gidawat niya ang lakang sa mga mananagat sa ilang lungsod, iyang gikondena ang giingong mga personalidad nga gikatahong gimaniobra ang iyang mga konstituwente aron supakon ang proyekto.
Sa suwat nga gipadangat ngadto kang BFAR Undersecretary Cheryl Marie Natividad-Caballero, mga sakop sa Bagacay Fisherfolks Association ug Bagacay Homeowners Association niawhag sa ahensya nga molihok sa ilang ilang hangyo kay ang reclamation project makamugnaog kadaut nga pemanente na sa mga palibot sa baybayon.
Si Annabelle Pomento, kinsa nangulo sa duha ka grupo, niingon nga ang proyekto gipasiugdahan sa kagamhanan sa lungsod sa Consolacion ug La Consolacion Seafront Development Corporation (LCSDC).
“However, should the reclamation project push through, this will lead to irreparable damage to us low-income communities. In particular, fisherfolks and our aquatic resources will suffer due to the actions of Mayor Alegado and LCSDC,” dugang ni Pomento.
Gikutlo usab ni Pomento ang usa ka pagtuon sa FBS-Environment and Community Research and Development Services, usa ka think tank nga nakabase sa Sugbo nga nagtutok sa mga isyu sa kinaiyahan, nga nag-ingon nga labing menos 500 mangingisda gikan sa Consolacion, Mandaue, Lapu-Lapu, ug Liloan mawad-an sa ilang panginabuhian kon madayon ang reclamation project.