Si manlalaban ug Cebu City Tourism Commission (CCTC) head Jocelyn “Joy” Pesquera maoy gitudlo nga molingkod sa bakanteng pwesto ni City Councilor Donaldo Hontiveros.
Si Cebu City Mayor Michael Rama nikompirmar sa pagkatudlo ni Pesquera ngadto sa mga tigbalita human sila ni Hontiveros nanumpa isip mayor ug bise mayor sa dakbayan.
Si Rama nipahibawo sa mga sakop sa media nga si Pesquera maoy mohulip sa nabakanteng pwesto ni Mayor Donaldo Hontiveros sa Konseho sa dakbayan.
“Atty. Joy Pesquera is the ideal person suited for the position because of her good public service track record aside from her loyalty for PDP-Laban and Partido Barug,” matod ni Rama.
Ang paglihok sa mga nag-unang posisyon sa City Hall nahitabo usa ka adlaw lang sa pagkamatay ni Mayor Edgardo Labella.
Apan si Rama wala magtumbok og tinong petsa kon kanus-a makasugod si Pesquera sanglit giproseso pa nila ang mga dokumento sa dili pa siya maka-asumer sa iyang katungdanan.
Base sa Section 8 sa Republic Act 5185 kun Decentralization Act of 1967, ang pagtudlo kang Pesquera aprobahan pa ni Presidente Rodrigo Duterte sulod sa 15 ka adlaw sa petsa sa pagtudlo.
Dili kini ang unang higayon nga nakaserbisyo si Pesquera sa City Council.
Sa buwag nga pakighinabi, si Pesquera niingon nga gidawat niya ang appointment apan nasubo nga kini nahitabo human sa kamatayon ni Labella.
“I am happy because I will be able to serve again as city councilor because I will be able to present the plans that I already have. At the same time, I am also sad that it had to be in this manner,”matod ni Pesquera.
Si Pesquera nga nitug-an sa SunStar Cebu nga nasubo gihapon siya nunot sa kamatayon ni Labella, midugang nga suportado kaayo kaniya ang kanhi mayor sanglit kauban pa sila sa ilang pagka konsehal ug hangtod nga nahimo siyang mayor niadtong 2019.
“He was really very conscientious, he was our pillar especially when we became colleagues in the city council. He made sure that everything we passed like resolutions and ordinances would be aboard and can stand the test of time. When he was the mayor and I headed the Cebu City Tourism Commission, he was very supportive and he allowed us to develop that and promote tourism in the city that would really benefit the people,” dugang ni Pesquera.
Kon matudlo na siya sa Konseho sa Siyudad, si Pesquera nagplano nga i-institutionalize ang pipila ka mga programa nga iyang gipaila isip pangulo sa CCTC ug balikon ang pipila sa ilang mga ordinansa ug usbon kini.
Si Pesquera kanhi konsehal sa dakbayan sa Sugbo niadtong 1998 hangtod 2007.
Sa 2016 hangtod 2019, si Pesquera nagsilbi na usab sa bag-ong termino isip konsehal sa siyudad.
Atol sa 2019 elections, si Pesquera nidagan pagka kongresista sa south district sa dakbayan sa Sugbo apan napildi ni incumbent Rep. Rodrigo “Bebot” Abellanosa.
Sa dihang napili si Labella nga mayor, si Pesquera natudlo sa daghang mga posisyon sa City Hall.
Gawas nga pangulo sa CCTC, gitudlo usab si Pesquera isip manager sa New Oasis for Adaptation and a Home (NOAH) complex sa South Road Properties, nga nagsilbi nga isolation facility sa mga kaso sa Covid-19 sukad sa miaging tuig.
Sa pagkatudlo ni Pesquera, nagpabiling pabor sa administrasyon ang balanse sa gahom sa Konseho sa dakbayan diin 10 ka konsehal ang kaalyado ni Rama samtang walo ang ubos sa oposisyon. (CAL)