“Ing Ginu kasaman Na la ring labing maglaram, dapot matula Ya karing apagkatiwalang tau.”
~ Diparan | Dangka 12: Sunis 22 (Proverbs 12:22)
“Ninu mang apagkatiwalan king asna karitak malyari ya namang pagkatiwalan king dakal, at ninu man ing mapamirayit king asna karitak ya naman kamapamirayit king antita karakal.”
~Lukas| Dangka 16 : Sunis 10 (Luke 16:10)
“O e yu balu a ding e matalaru e de amana ing kayaryan ning Dyos? E ka mapipirayit: e ring e makatud king pamakisiping, o ding sasamba karing dyos-dyosan, o ding makipangatawan, o ding sakim, o ding mapaglasing, o ding mapalmura, o ding gagawang pangabinabai o kabulugan, o mapanekas amana de ing kayaryan ning Dyos. At deti ati lu kekayu ding mapilan. Dapot mewas kayu, mipabanalan kayu, mitalaru kayu king lagyu ning Ginung Yesu Kristo at king Diwa ning Dyos tamu,”
~ Mumunang Korintyano | Dangka 6 : Sunis 9-11 (1 Corinthians 6:9-11)
“Inya sa’t balang metung kekayu dapat itabili ing kelang katutwan at magsalitang tutwanan karing siping yung bale, uling kayagum na katamu ning metung a katawan.”
~ Ding Episyano | Dangka 4 : Sunis 25 (Ephesians 4:25)
***
Deng taung malaram at mapamirayit e la manwala king katutwan a ing Dyos akakit na ngan at balu na ngan ing sablang daraptan tamu, sasabyan, isipan at pati na nung nanu ing laman ning pusu tamu agyang babalakan tamu pamu. Mekad pati ing kapanaligan o kapanwalan da king Apung Ginu e mu naman tutu.
Ing sakit deng taung anti reti e la mu ditak deng paglaraman da’t mumulangan. Deng taung mirinan dakal a upaya dakal la naman malyaring piraytan uling ati yu karing gamat da ing upaya at deng keraklan tatalnan da la batal uli ning apapaniwala da la kapamilatan ning e tutung pepakit dang kadakilan neng ila masalapi la, o ding pengari da masalapi la at mayupaya la pa uli ning mekilala lang pekapun agyang e no man tapat a kapagnasan king pamanimunu da.
Mapalyari mu naman a inyang minuna tapat la king tungkulan dang pigkalub ding malda karela. Kaybat milabas ing panaun a ikit da at tikman da ing dagul ning upaya da at ing nanabangnan da kaniti—mesilo na la king kislap ding kata-katang salapi a daralan karing palad da. Mekatakman lang kata-kata (millions) inya buri da dinalang kata-kata (hundred millions) na naman kaybat libu o dinalang libung kata-kata (billions).
Ala ya kasing kebsyan ing taung e manwala king Apung Ginu o ing agyu Nang akit, dandaman at abalu ngan ing sablang gagawan tamu, pabulung mang amanu dandaman Na o agyang e ta bubulad dapot king isip atin tamung sasabyan. Antita Ya kayupaya ing Ginu.
Alang kalaraman o kapamiraytan ing e Na akakit, darandaman o ababalu. Ala tamung asalikut Kaya. Ala tamung apaglingad Kaya. Alang malaram o mapamirayit ing malyaring makamulang king Ginu.
***
Dake Talabaldugan:
mipabulasuk (pangdiwa) binulasuk, migbulasuk e sasaryan at e binalak. English – rushed without direction accidentally or unintentionally for whatever cause or reason. Alimbawa king pamangamit: “Keng dindam nang kamarinayan a penyabi ding dayu mipabuiasuk yang linundag keng awang at begut ne ing talibung nang Tarik kadugpa na bitis keng gabun.”
mipabulatlat (pangdiwa) binulatlat, migbulatlat e sasaryan at e binalak. English – nitpicked on something or anyone unintentionally for whatever cause or reason. Alimbawa king pamangamit: “Ala yang balak dapot mipabulatlat ya kareng panyabyan ning kayarap nang asna kayasa batal king kaparatutan.”
mipabulaybulay/mipabulebule (pangdiwa) binule-bule, migbulele, mibwal ala keng oras e sasaryan at e binalak. English – thought deeply about something unintentionally for whatever cause or reason. Alimbawa king pamangamit: “E ya mipabule-bule ing pisan ku nung e mu inyang takman na ing kasakitan a bunga ning kapaburen na manibat inyang tikman na ing alak kareng kakaluguran na.”
mipabulung (pangdiwa) binulung e sasaryan at e binalak. English – whispered unintentionally for whatever cause or reason. Alimbawa king pamangamit: “Keng ikit nang kapanekasan Milan, mipabulung ya keng mipapnekasan a kasiping na. at kanita megumpisa ing tumbukan.”
mipabulus (pangdiwa) binulus, mibulus ala keng oras e sasaryan at e binalak. English – got releases, freed unintentionally for whatever cause or reason. Alimbawa king pamangamit: “Masisilab keng tanggapan ning pekapun ning sukulan inya mipabulus la reng pakasukul inyang ing magbante e na apnasingan menabu ya ing susi a ikwa ning metung a makasukul.”
***
SADYANG GAWI at AMANU DA RENG KAPAMPANGAN
Nung lalabas ka arap pisamban Angeles, keraklan manakit kang mamisaling pupul dang bungang tanaman, gule at pati na ubi a maralas magagamit keng pamaglutu o pamangogo ale o kalame. Mura mu ing balang paninda at makabitasa kang mayap a uring bungang tanaman, gule o nanu man ing pamisali da uling e la gagamit makakarok a fertilizer.
Ing pamisali da kayagtal-agtal pa, kapupul-pupul pa at mangabaldugan a sagiwa iti, at e pa melangi at kelakon nyaman lasa at sustansya.
Ngening panaun ayting atin nang social media, ating mig-post karing pamisali dang ubi reng kabalen tamu Porak a Aeta at malyari kang sali karela online uling ating sasaup karela bang mipadala ing seli mu keka. E kaya maging sangkan iti bang ding mamisali keng arap pisamban Angeles mabyasa lang mag-online marketing at ila na mismu ing mamisali kapamilatan ning Facebook.
Uta mu pin, metung na namang gawi itinng mikaka-panganib mabating na king payntungulan. Mekad pilan mung banwa makalingwan na, o mekad saguli na mu.
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com, mag-text o maus para karing kutang o munikala: 0942-3924-399 o 0945-3795-270.