Gihuboan sa sapot, gidunggab sa makadaghang mga higayon ug di pa igo, gidakdakan paog dakong bato.
Ingon niini ka luog ang pagpatay sa biktimang giilang si Michael Mariano, 17, tinun-an sa grade 12, kinsang lawas napalgan sa alas 7:00 sa buntag sa Biyernes sa Purok Mahigugmaon, Brgy. Gabac, lungsod sa Bantayan, mga isla sa Bantayan.
Si Mariano giingong usa ka bayot, aktibo sa youth organization sa ilang dapit ingon man sa mga kalihukan sa simbahan.
Si Patrolman Florante Desucatan, imbestigador sa Bantayan Police Station nga nahinabi sa Superbalita Cebu, nagkanayon nga si Mariano alas 9 sa gabii sa Huwebes, Nobiyembre 18, mipauli gikan mitambong og birthday party sa iyang ig-agaw sa nahisgutang lugar.
Ang apuhan nitug-an sab nga alas 11 nianang gabhiona, iyang nakit-an ang biktima nga nagtubag sa modules sa klase.
Apan natingala sila kay pagka-ala 1:00 sa kaadlawon sa Biyernes, nabantayan sa apuhan nga wala na si Mariano sa iyang lawak.
Gipangita nila apan napakyas sila. Nakugang nalang sila mga alas 7:00 buntag sa Biyernes sa buntag nga napalgan sa kalibunan nga hubo nga patay na.
Dunay moabot sa 14 ka mga samad dinunggaban sa lawas agi sa kutsilyo, ingon man gidakdakag bato.
Nagtuo si Desucatan nga duha o tulo ka mga tawo ang nihimo sa kremin.
Matod ni Desucatan nga dili pa sila makasulti kon gi "rape" ba si Desucatan kay ila pang gipaabot ang autopsy report ni Dr. Benjamin Lara, medico legal sa Scene of the Crime Operations (Soco) 7.
" Kon makita sa samad niya ingon man gidakdakan pa sa bato, dinhi naka-ingon nga dunay grabing kalagot ang nihimo sa kremin.Wala na siyay sinina, unya ang underwear ingon man short gihubo," dugang ni Desucatan.
Mao kini ang hinungdan nga sila nagduda nga giabuso si Mariano sa wa pa patya.
Nunut niini nagduda sab sila nga gihilabtan.
Apan hangtud wala pay resulta sa paghiling sa Soco sa lawas, tanang mga anggulo ilang gitan-aw.
Ang crime scene sab mga 200 metros gikan sa balay ni Mariano.
Nawala ang usa niini ka selpon ingon man kwarta.
Apan ang usa mga cell phone nga Iphone gibilin gna open ingon man ang laptop.
Dunay dummy account sa usa ka cartoon character nga mi-chat kang Mariano nga magkita sila, apan niana pang mga alas 4 sa hapon sa Huwebes.
Ang kapulisan nakarekuber sa crime scene sa usa ka handle nga plastic sa usa ka hinagiban.
Hapon sa Sabado narekuber sab ang t-shirt nga puti sa biktima nga gilabay sa kakahuyan mga 500 metros ang gilay-on gikan sa crime scene.
Si Mariano bugtong anak, nailo sa iyang inahan samtang ang amahan driver sa traysikol.