Nihilak ang usa ka habalhabal drayber human siya dakpa ug diretsong gipriso sa mga sakop sa Bureau of Jail Management and Penology (BJMP) niadtong Biyernes, Nobiyembre 19, samtang naghatod og mga saging sa usa ka piniriso sa Cebu City Jail sa Barangay Kalunasan, Dakbayan sa Sugbo.
Ang nadakpan mao si Rosel Malgue, 44, taga sityo Lower Camparang, Brgy. Kalunasan.
Si Jail Officer 2 Bert Reasol, chief investigator sa CCJ, niingon nga si Malgue naghatod unta og usa ka sipi nga saging ardaba ngadto sa usa ka piniriso, apan ipaagi lang sa dunol.
Nasayran nga ang protocol sa jail facilities nga kon dunay idunol gikan sa usa ka tawo alang sa persons deprive of liberty (PDL), kinahanglan nga kini inspeksiyunon una atubangan sa nagdala una pa isulod sa selda.
Matod ni Reasol nga sa paghiling na sa saging, didto na nadiskobrehan ang ubay-ubay nga tag-as sa pakete sa shabu ang gipasilup-it sa tunga sa saging nga pinutos pa og tissue.
Moabot sa 17 ka mga pakete sa gidudahang shabu ang nakuha gikan kang Malgue.
Si Malgue niingon nga wa siya masayod nga dunay drugas sa sulod sa saging.
Depensa ni Malgue nga nangindahay ra siya nga mokita og P50 nga pamasahe sa usa ka babaye nga nagpailang asawa ni Robert Manapsal, usa ka piniriso.
Dugang ni Malgue nga mao pa unta ang iyang pag[amasahero ug dihang nihangyo kaniya ang maong babaye nga mohatud sa saging bugti sa suhol nga P50, siya nisugot.
Wa siya magdahom nga diretso na siyang ibalhog sa prisohang kay giingong wa siya masayod nga illegal drugs ang sulod sa saging.
Tinuod man ang iyang gisulti o di, pasakaan siya og kasong kalapasan sa Republic Act 9165 kun Comprehensive Dangerous Drugs Act of 2002.
Adto na niya pamatud-an sa korte kon tinuod ba siyang inosente o sad-an.