Naunsa na man ang dagan sa pulitika sa nasud? Si Presidente Rodrigo Duterte, nga daw diktador karon, mao na man ang nangulo sa pag-ataki batok kang Bongbong Marcos, ang anak sa diktador Marcos. Abi gyud sa kadaghanan nga sila nagkahiusa.
Samtang nakig-alayon ang anak ni Presidente Duterte nga si Inday Sara kang Marcos Jr.,nagkagrabi ang mga isyu nga giisa sa amahan. Walay gihisgutang pangalan si Digong. Apan klaro man kon si kinsa ang iyang gipasabot nga mogamit og cocaine. Dayon nidugang ang Presidente nga si Marcos Jr. usa ka spoiled nga anak.
Naa pa gyud ang nag-ung-ong nga kaso sa disqualification. Unsaon man kining anak sa diktador, wa man mosumiter og SALN kun Statement of Assets, Liabilities, and Networth. Usa man kini sa paagi pagbatok sa pangurakot.
Kataw-anan lang kay samtang napildi sa korte si Marcos Jr. kay way SALN kaniadtong panahon sa diktadurya, si Digong ug iyang mga sinaligan di magpakita sa ilang SALN karong sila ang naa sa poder.
Nakahinumdom lang ko sa sulti ni Sen. Manny Pacquiao. Siya mapasigarbuhon sa iyang SALN. Nadato man gud siya dili tungod sa pagpangawat sa kaban sa nasud. Apan ang mga opisyal nga kawatan maulaw mopakita.
Klaro hinuon ang hinungdan nganong gibuhat ni Digong ang pagduot kang Marcos Jr. Gusto niya tabangan ang iyang alalay nga si Sen. Bong Go nga iyang gihulagway nga matinud-anon ug kugihan. Naa na guy mga Malasakit Center sa lain-laing dapit sa nasud. Motunga pa gyud sa mga lugar nga nasunogan.
Samtang wala ko makabasa nga personal nga nibawos si Marcos Jr., ang mga Marcos’s loyalist grabeng ulbo. Makita na nato nga nagbinayloay og mga pulong ang mga komentarista ug ang mga online army.
Mga babag
Nag-una man tuod si Marcos Jr. sa lumba alang sa pagka presidente, apan naghangak. Daghan kaayo siya og babag sa iyang pagdagan.
Mao sab ang pagdagan ni Inday Sara. Kinahanglan siya mobalik sa Hugpong ng Pagbabago aron paggunit sa renda sa liderato. Nagpadulong man sa pagkawatakwatak ang mga DDS kun Duterte Diehard Supporters. Nagka-anam kadaghan ang mga DDS sab kun Duterte Dating Supporters.
Usa nga sulbahunon ni Inday Sara mao ang kalagot sa iyang amahan. Sa tuyo sab ni Digong nga modaog si Sen. Bong Go, grabi niyang pagbunal kang Marcos Jr. nga maoy presidentiable ni Inday Sara.
Apan si Sen. Bong Go kuyaw nga maapil sa pagkayabo tungod niining Pharmally. Kining mga transakyon sa Pharmally tungod sa bata-bata ni Sen. Go nga si Lloyd Lao mobalor og pipila ka bilyon. Dili na minilyon ang kawat sa panahon ni Duterte, binilyon na.
Pacquiao
Sa pagkakaron, daw nagsuroysuroy sa tibuok nasud si Sen. Manny Pacquiao diin sundon ug dugokan siya sa mga kabus. Klaro kanako ang popularidad niya diha sa mga kabus gyud labi na diha sa Mindanao.
Ug dakong bahin sa giingong constituency sa mga Duterte diha sa Mindanao makuha ni Pacquiao.
Dili man lang ang mga pro-Sara ang maigo. Lakip na niini si Sen. Bong Go. Nakabantay ba kamo nga balik-balik gyud ang tema ni Sen. Pacquiao batok sa kurapsyon. Alang sa senador, kon modaog man siya, iya gyud ipapriso ang mga kurakot.
Sayon, lanog sab kaayo ang iyang mensahe batok kang Marcos Jr. dihang nibisita siya sa marker diin gidagit si Fr. Rudy Romano kaniadto sa Tisa, Syudad sa Sugbo.
Lakip na kini sa paninguha ni Pacquiao, ang Promdi pinangulohan ni Mimo Osmeña, ug Joeyboy Holganza sa PDP-Laban Koko wing nga makapahak og dakong boto dinhi sa Sugbo.
Leni
Samtang naglisod naghangos na ang mga giingong frontliners sa mga survey sama nilang Marcos Jr. ug mga kandidatong naa sa kampo ni Duterte, relaks kaayo ang nagkasaka nga kampanya ni Bise Presidente Leni Robredo.
Karon lang bag-o, dinhi si Leni ug ang Pacman nga niluhod sa kasal ni Jose Lorenzo Abellanosa, anak ni Kong. Bebot Abellanosa. (DM nako @anol_cebu)