Nanumpa na sila si Mayor Michael Rama ug Bise Mayor Dondon Hontiveros isip hingpit na sa ilang tagsa ka mga posisyon. Kini human mamatay si Mayor Edgardo Labella sa Biyernes sa kaadlawon tungod sa pneumonia. Basin daghan ang nakapangyamiid kanila ni Rama ug Hontiveros nga nagdali sa pagpanumpa bisan kon gihaya pa ang mayor.
Kay patay na man si Labella, mahimo ra unta silang makahuwat sa hustong panahon sa pagpanumpa isip hingpit nga mayor ug bise mayor. Kay human napupos ang 30 ka adlaw sukad ni-leave si Labella, maisip nang “hingpit” sila sa ilang katungdanan.
Mahimo na kaayo ni Rama ang iyang mga gimbuhaton sa pagtaktak, pag-hire ug pagsuspenso og mga opisyal ug kawani.
Ngano kaha nga ila ning gibuhat? Di sila ubos og pangutok si Rama sa pagbuhat niini. Dunay lawom ug dakong rason nga kinahanglan kini nilang buhaton ni Hontiveros. Hayan nananghid na sab sila sa pamilya sa mayor.
Ang duha, sila si Rama ug Hontiveros, nasayod sa kamahinungdanon sa numero sa Konseho diin sila nagagikan. Ang numero sa Konseho 10-8, diin ang Barug PDP Laban nakabentaha batok sa Bando Osmeña Pundok Kauswagan (BOPK). Kon di dayon matapakan ang numero, kuyaw ang posisyon sa partido.Di lang tingali kini ang rason, dunay mas dako ug lawom pa.
Kon wa magpahibawo sila si Rama ug Hontiveros sa pamilyang Labella ug kaubanan, maorag salikwaot paminawon. Apan sumala sa giingon ni Rama nga mas lig-on karon ang ilang relasyon karon, ila gyud nang gisanghiran ang pamilya ug kaubanan.
Kay kon wa kini nila buhata, tan-awon silang hangol sa gahom, wa makahuwat sa tukmang panahon, bisan mismo sa ilang kaubanan. Gihuwat unta mahuman ang lubong. Unya nagdali sab pagtudlo kang manlalaban Jocelyn Pesquera aron mopuli kang Dondon sa Konseho. Mahibaw-an kining tanan ning mosunod nga mga adlaw.