MIDILAAB ang dakong kalayo sa tindahan nga namaligya og gasolina alas 5:20 sa hapon, Sabado, Nobyembre 20, 2021, sa probinsiya sa Maguindanao.
Sa taho gikan sa Bureau of Fire Protection (BFP) sa Sultan Kudarat, nakadawat sila og tawag sa natigayon nga sunog sa Sitio Kalid, Barangay Crossing Simuay, Sultan Kudarat, Maguindanao.
Abtik nga nagresponde ang kabomberohan sa nasunugan ug dako na kaayo ang kalayo sa diha nga sila miabot sa sitio.
Miabag sab ang mga firetrucks sa mga kasikbit munisipyo, hinungdan nga nakontrola ang sunog.
Gikanayon sa mga nakakita nga bag-o ang sunog, dunay mipalit og gasolina ug adunay nanigarilyo ug didto midilaab ang kalayo.
Naugdaw ang tindahan nga namaligya sa takal-takal nga gasolina lakip na grudo, duha ka balay, duha ka sakyanan ug mga kabtangan sa mga nasunugan.
Sa balaod, hugot nga gidili ang pagpamaliya sa takal-takal nga gasolina, apan sa Maguindanao, naghitak kini daplin sa national highway.
Ang BFP-Sultan Kudarat Maguindanao padayon pa nga nag-imbestiga sa kinatibuk-ang damyos sa sunog.