NAGHUGYAW ug puwerteng lipaya sa mga supporters nila presidential aspirant Ferdinand "Bongbong" Marcos Jr. ug Davao City Mayor Sara Duterte atol sa BBM-Sara Unity Caravan sa Tagum City Dominggo, Nobiyembre 21, 2021.
Paggawas nila Mayor Sara ug Marcos, nanghatag kini og mga t-shirts sa mga nag-atang nga mga supporters.
Atol sa pamulong ni Mayor Sara, giingon niya nga hangtud karon, naa pay mga tawo nga lunod-patay ang pagsuporta kaniya aron padaganon pagka-presidente, apan alang kaniya, lisod na kaayo isulti ang mga rason diin kinasingkasing nalang ang iyang pagpasalamat ngadto kanila.
Sumala sab ni Marcos, andam siya nga ipadayon ang mga maayong nasugdan sa administrasyon, diin ingon sab niya nga maghugpong ang tanang Pilipino, mobangon alang sa kalinaw sa kinatibuk-an ug malinawong Pilipinas.
Perte sab nga paghugyaw sa mga supporters dihang migawas ang anak ni Bongbong nga si Sandro.
Ang batan-ong Marcos gikagubtan karon gumikan sa iyang giingong kaambongan ug pagkaintelihente, ilabi na kon mang-iningles.
Nanumpa sab ang mga bag-ong miyembro sa Partido Federal ng Pilipinas sa Tagum City ug mga kasikbit nga dapit sa Davao del Norte.
Kompleto sab ang mga opisyales sa Hugpong Ng Pagbabago ug ang mga kantidato sa 2022 elections ilawom niini nga partido.
Bisan ulan kaniadton Dominggo, wa kini giigsapayan sa mga supporters makita lang ang ilang giidolo nga kandidato sa 2022 elections sa labing taas nga posisyon sa politika sa nasud.