Bucks, Giannis nagmangtas

MIPABUHAGAY og 32 puntos ug 20 ka rebounds ang “Greek Freak” nga si Giannis Antetokounmpo aron dalhon sa 117-108 nga kadaogan ang Milwaukee Bucks batok Orlando Magic sa NBA regular season game kagahapon.

Si Bobby Portis mikulit pud og season-high 24 puntos ubanan sa 15 rebounds alang sa defending champions. Ang Bucks miposte sa ilang ikatulo nga sunodsunod nga kadaogan ug mi-improve kini ngadto sa 9-8 (win-loss) nga baraha.

“We’re getting better. We’re competing,” batbat ni Antetokounmpo.

Si R.J. Hampton adunay 19 puntos gikan sa bench para sa Magic. Midugang og 14 puntos si Jalen Suggs, samtang miamot og 13 puntos matag-usa si Chuma Okeke ug Mychal Mulder.

Nagpabiling kulilat ang Orlando sa Eastern Conference nga adunay baraha nga 4-13.

Milabaw na ang Milwaukee sa sayong bahin palang sa first quarter tungod sa makabungog nga 18-2 run niini.

Mas gipalapdan pa sa Bucks ang ilang bentaha sa third quarter human miigo og tres si Antetokounmpo ug Portis. Gisundan kini og layup ni Antetokounmpo, laing tres ni Portis ug jumper ni Khris Middleton aron inaton ang labaw sa 25 puntos.

Miabot og 29 puntos ang pinakadako nga labaw sa Bucks, 96-71, sa pagsulod niini sa fourth quarter. Apan mi-rally ang Magic sa fourth quarter nga maoy nakasikit sa final score.

Matod ni Portis nga mi-relax na sila sa uwahing quarter nga maoy nakahatag og oportunidad sa kontra nga makabalik. Dugang niya nga di maayo sa usa ka team nga mo relax hangtod wala pa motingog ang final buzzer.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph