INGON sa giduwa-duwaan lang sa mga politiko ang katawhan pinaagi sa ilang mga pagsibog ug paghulip sa mga kandidato. Drama-drama, paigot, padili-dili sa pagdagan unya misang-at diay sa kandidatura.
Sa mga karaan, ang politika gitawag nga bugnong lugaynon. Gani, usa ka political kingpin sa Sugbo niingon nga usa kini ka “devil’s game,” duwa sa demonyo. Apan ang mga tawo, ang mga botante lagi, ang giduwa-duwaan.
Nahinumdom ko sa estorya sa usa ka mag-uuma nga dunay kabaw. Usa ka adlaw niana, nakahukom siya nga moapil sa lumba sa mga kabaw sa laing barangay. Gikuyog niya ang iyang anak ug nanglakaw sila.
Pag-abot nila sa unahan, naagian nila ang pundok sa mga tawo nga nag-estoryahay. Usa kanila niingon, “Pagkabugo ning amahan ug anak. Naghago-hago sa paglakaw nga mahimo man unta silang mosakay sa ilang kabaw.” Pagkadungog nila niini, dali nga nanakay sa kabaw ang amahan ug anak ug nipadayon sa ilang panaw.
Wa dangti og dugay, naagian nila ang laing grupo sa mga tawo nga naglakaw sa dalan. Usa sa maong pundok miingon, “Pagkaluoy sa kabaw.” Pagkadungog nila niini, nanaog ang anak sa kabaw. Ang iyang amahan na lang ang nagsakay ug nipadayon sila.
Pag-abot sa unahan, naagian nila ang pundok sa mga batan-on. Usa kanila niingon, “Salbahis nga amahan, gipalakaw lang ang iyang anak.” Pagkadungog sa amahan, nanaog siya sa kabaw ug ang iyang anak maoy gipasakay. Nipadayon sila. Naglakaw na lang ang amahan.
Nagsingabot na sila sa ilang padulngan dihang naagian nila ang pundok sa mga tawo nga nag-inom og tuba. Usa kanila nga hapit na magsapid ang dila miingon, “Pagkaluoy sa tiguwang. Way uwaw ning bataa.” Pagkadungog nila niini, ang amahan ug anak igo na lang nangawot sa ilang mga ulo.
Ang amahan ug anak atong matangdi sa mga botante ug ang kabaw sa ilang boto. Ang laing-laing pundok sa mga tawo nga ilang giagian sama sa mga politiko nga morag modiktar sa mga botante kon kinsay botohan. Ang mga botante, sama sa amahan ug anak, naglibog kon sakyan ba o dili o kinsa kanilang duha ang pasakyon sa ilang kabaw.
Sanglit ila man ang kabaw, sila unta ang magbuot kon sakyan ba nila kini o dili o kinsay mosakay niini. Ang nakapait, nga sa umaabot nga piniliay, tungod sa ilang kalibog, ila na lang ibaligya ang ilang kabaw, sama sa mga botante nga mobaligya sa ilang mga boto.