Permit to campaign sa NPA gibantayan

GIBANTAYAN sa Armed Forces of the Philippines (AFP) ang pagpangilkil sa New People’s Army (NPA) sa Central Visayas nunot sa nagkaduol nga campaign period alang sa piniliay sa Mayo 2022.

Si Army Major Joe Patrick Martinez, kumander sa 3rd Civil Relations Group sa Visayas Command (Viscom), nagkanayon nga ang pagpangilkil sa mga NPA sa mga kandidato mao ang pagsabotahe sa katungod sa mga tawo nga mopili sa ilang gustong botaran.

Ang mga kandidato giawhag nga motaho kon tanyagan og permit to campaign sa mga komunista.

Matag eleksyon, kanunay nga makadawat og taho nga ang mga sakop sa NPA sa mga bukirang dapit sa isla sa Negros ug sa Eastern Visayas mohimo sa maong lakang.

Awhag ni Martinez sa publiko ilabi na sa Negros Oriental ug sa Leyte nga kon aduna silay mabantayan nga mga npa nga naghimog pagpangolekta sa mga kandidato mo-report dayon sa labing duol nga kampo sa mga sundalo o kaha sa kapulisan.

Mipasalig kini nga sila sa armadong kusog sa nasod mohatag kanilag proteksyon batok sa mga komunista nga iyang gihulagway nga nagkahinay na tungod sa kadaghan na nga mga sakop niini nga mibalik na sa sabakan sa balaod.

“Sa karon pa lang, wala pay nahitabo. We would like to advice our people ang mga komunidad na mag-connect na sila sa ilang otline numbers didto ug permi sila nga mohatag og impormasyon sa atong kasundalohan,” matod ni Martinez.

Dugang niya nga sa pagkakaron, wala pa silay nadawat nga naa nay mga armadong sakop sa NPA sa isla sa Sugbo apan adunay grupo nga gitinguha nga makabalik ang ilang pwersa dinhi.

Ang maong grupo nang-recruit aron moabin sa armadong pakigbisug ilabi na sa mga barangay nga daling mahaylo sa pasalig sa mga komunista.

Apan masaligon sila nga dili na madala ang mga Sugboanon sa maong matang sa pagpanglingla tungod kay nakaagi na sila niini diin usa ni sa hinungdan nga naglisod ang ilang kinabuhi kon adunay presensya sa mga komunista.

Ang mga molupyo na mismo matod ni Martinez ang mibalibad nga mobalik ang armadong NPA sa Sugbo nga maoy hinungdan nga dili makaporma ang mga walhong grupo.

Nagpadayon usab karon ang gihimong internal security operation sa mga sundalo sa Negros island nunot sa posibilidad nga mohimong pagpangatake ang mga NPA agig bawos sa kamatayon sa ilang labaw nga si Ka Oris didto sa Mindanao.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph