KUTOB ra duha ka tuig ang tawo kon bakunahan ta. Pag-abot og duha ka tuig, mangahimo kita nga zombie. Mangahurot ta tanan kay naa daw na microchip gibutang sa bakuna.
Pipila lang kini sa mga negatibong istorya bahin sa bakuna batok sa coronavirus disease 2019 (Covid-19).
Sa dakbayan sa Ormoc, sukwahi ang nakita sa mga tawo. Wala mahadlok sa mga negatibong taho o fake news. Daghan ang nagpabakuna. Gidugok ang vaccination sites.
Naobserbaran kini sa Ormoc City Health Department (OCHD).
Ang epekto sa bakuna dako og tabang sa grabeng pag-ubos sa kaso sa Covid-19 sa dakbayan, dugang sa OCHD.
Sa miaging mga buwan, ang Ormoc nakatala og tag 15, 20 o 50 ka mga bag-ong kaso sa Covid-19 matag adlaw, apan sa pagsaka sa gidaghanon sa mga nabakunahan, nag-anam na kini og kaubos.
“In a day mag-test ta og 100 ka samples and most of them mga close contact or primary contacts. But we observed nga less na kaayo ang mag-positive and take note, most of them mga primary contacts,” matod ni Jester Zacarias, tigpamaba sa OCHD.
Diha’y buwan nga niabot sa 200 ang aktibong kaso sa Covid-19 nga miresulta sa pag-estrikto sa mga polisiya.
“They need to understand that as a mayor of this city, my duty is to protect the Ormocanons from getting sick because of Covid-19,” matod ni Mayor Richard Gomez.
Si Gomez nimugna sa Ormoc City Vaccination Task Force diin ilang giaprobahan ang pagpalit og 270,000 doses sa AstraZeneca.
Ang Ormoc City dunay 240,453 total population ug 146,532 nag-edad og 18 pataas nga target bakunahan.
Gawas sa AstraZeneca nga gipalit, duna pay mga bakuna gikan sa national nga niabot sa Ormoc gumikan sa way hunong nga komunikasyon ni CongW. Lucy Torres-Gomez.
Base sa datos sa Department of Health-Eastern Visayas, ang Ormoc ang nag-unang siyudad sa rehiyon nga daghan ang nabakunahan ug nadawat nga bakuna.
“As of October 27, 2021, naa na sa 162,939 ang naturokan nato og bakuna; 99,292 ang naka first dose ug 63,647 ang fully vaccinated,” matod ni Zacarias.
GIHATUD SA BARANGAY
Aron mas mapadali ang pagbakuna, gimando ni Gomez nga ihatud na sa kada barangay ang bakuna aron dili na mahago og biyahe sa siyudad hilabi ang tua sa bukiran.
Ning buwana, nahuman na ang vaccination sa kada barangay ug gisugdan nasab ang walk-in vaccination para sa mga wa makatungha.
Gipaniguro sa LGU-Ormoc nga sa Disyembre o Enero, makuha sa dakbayan ang herd immunity.
Dili na lisud ug wala nay nasugatan nga hagit ang vaccination team sa Ormoc gumikan kay nakita na sa kadaghanan ang maayong epekto sa bakuna.
Ang mga ginikanan, wala na magduhaduha sa pagpabakuna sa ilang mga anak edad 12 ngadto sa 17.
Sa unang adlaw, dunay 2,000 ka mga bata nga target mabakunahan apan wala magtuo ang city health nga molapas pa kini sa ilang gilauman.
Niabot og 2,484 ka mga bata ang nabakunahan gamit ang Moderna.
“Nakita gyod nato nga nawala na ang stigma nga mahimong zombie or kutob ra two years ang tawo,” dugang ni Zacarias.
PADUNG ZERO CASE
Tungod sa pagsaka sa gidaghanon sa nabakunahan sa Ormoc, taudtaod na nga usa ra ang bag-ong kaso nga matala.
Sa paghimo ning balita, naa lang sa tulo ka aktibong kaso sa Covid-19 ang Ormoc ug panghinaot sa LGU ug City Health nga ma-zero case na ang Ormoc uban sa kooperasyon sa katawhan.
Gikan pa sa miaging tuig, niabot sa 3,376 ang nataptan sa Covid-19 sa Ormoc; 3,304 ang nakarekober ug 69 ang nakalas.