NANGANDAM ang kapulisan sa siyudad sa Sugbo sa pagpatuman sa hugot nga seguridad atol sa pagbalhin sa haya ni Cebu City Mayor Edgardo Labella paingon sa Cebu City Hall gikan sa Crystal Palace sa Miyerkules, Nobiyembre 24, 2021.
Matod ni Police Colonel Josefino Ligan, hepe sa Cebu City Police Office (CCPO), dili moubos sa 50 ka mga PNP personnel ang ipakatap nga maoy magsilbing area security ug mopatuman sa minimum health standard.
Nasabotan atol sa command conference nga gipatawag ni Ligan uban sa Cebu City Transportation Office (CCTO) nga ang mga dalan nga nakapalibot sa City Hall temporaryong sirad-an. Walay tugotan nga maka-park nga sakyanan sa daplin sa dalan duol sa haya sa mayor.
Ipahimutang ang lawas ni mayor Labella sa Plaza Sugbo atubangan mismo sa City Hall duol sa flag pole.
Gituohan ni Ligan nga dagsaon sa daghang tawo nga nagmahal sa mayor aron mohatag sa ilang katapusang pagyukbo niini sa dili pa siya itunod sa lubnganan.
Aron dili magdasok ang mga tawo, magbutang ang CCPO og one entrance ug one exit.
Dili mahimong magdugay ang molili sa haya sa mayor aron mapadayon ang social distancing.
“Within the immediate vicinity sa City Hall square, naa tay ipatuman nga entrance diha sa may La Nueva unya ang exit ari sa may Burgos St. the template sa Sinulog nga naay mga stretch nga ipang-close maoy atong ipatuman, corners nga ipang-close,” matod ni Ligan.
Alang niadtong mga tawo nga gustong mobisita sa haya nga magdalag sakyanan mamahimo sila nga maka-park dapit sa Plaza Independencia ug sa Compania Maritima aron dili maka hatag og ka huot sa dagan sa trapiko.
Aron masiguro nga hapsay ang pagpatuman sa seguridad ang mga police personnel nga mohatag sa security mohimog dry-run gikan sa Crystal Palace paingon sa City Hall.
Wala pa masayri kon mahinayon ang pagbisita ni Presidente Rodrigo Duterte sa haya, apan kon madayon kini, andam ang CCPO nga modugang og personnel uban ang Task Force Kasaligan.
Ang kanhi mayor hayaon sa City Hall sulod sa tulo ka adlaw ug duha ka gabii. Ihatod kini sa katapusang kapahuwayan sa Golden Haven sa Biyernes, Nobiyembre 26.