SA DI pa ko maghisgot og pulitika dinhi, ako sa ihatud ang akong kinasingkasing pahasubo sa nagbangotan nga pamilya ni kanhi Mayor Edgar Labella sa iyang pagpanaw.
Nagkaila mi ni Mayor Edlab niadtong director pa siya sa Ombudsman Visayas ug samtang ako reporter pa. Niadtong panahona, tingale usa ko sa iyang gipangutana kon naa ba siyay higayon nga modaug ba to kani anhing Kong. Raul del Mar sa Cebu City north district. Akong giprangkahan si Edlab nga lisud pildihon si Kongresista Raul ug nga modagan na lang siya pagka konsehal. Tinuod, midagan ug midaug, hangtud na bise mayor ug mayor. Mga pangandoy nga natuman.
Mayor Edlab, may you rest in eternal peace with our Creator.
***
Nakugang ba mo dihang dunay gipabuto nga storya si Presidente Rodrigo Duterte (PRRD) human sa substitution ug pagbakwi sa kandidatora niadtong Nob. 15 batok sa usa sa mga kandidato pagka presidente? Nakurat ko kay ngano gisulti to ni PRRD, bisan og pasumbingay, kay nakahibawo ta nga suod siya sa pamilyang Marcos ug ang iyang anak nga si Davao City Mayor Sara kandidato pagka bise president kauban ni BBM bisan og managlahi ang ilang partido.
Bisan og wa dayon gihinganlan ni PRRD nga ang usa sa mga kandidato pagka president huyang di sama sa iyang amahan ug naadik sa cocaine apan gitubag dayon ni BBM ug iyang giangkon nga dugay na to nga panahon ug nareporma na siya ug matud pa ni BBM nga sama usab sa mga anak ni PRRD nga naadik sa shabu. Maayo ganinaurong ang ilang panagsukliay sa dili maayo nga mga pulong.
Ato kuno nga sugkaron ngano nga na sulti to ni PPRD batok ni BBM nga kandidato man unta pagka president ni Mayor Sara? Daghan ang mga storya nga atong nadungog nganong nayugot si PRRD. Usa niini, matud sa akong tinubdan, kay ang gusto ni PRRD nga si Sara ang modagan pagka presidente ug si BBM ang bise presidente bisan pa kunohay sa iyang pagdumili kaniadto.
Di usab madawat ni PRRD nga naisahan sila ni BBM. Matud sa taho nga wa motunga si BBM sa ilang sabot ni Sara nga mag-abot ug mag-estorya uban ni kanhi Presidente Ate Glo sa usa ka paradise island sa Pampanga. Tungod niini, gipadagan ni PRRD ang iyang alalay nga si Senador Bong Go pagka presidente imbis nga bise presidente ra unta to ang iyang kandidatora ubos sa PDP-Laban Cusi wing.
Nahilum na tuod si PRRD ug BBM kabahin ani nga isyu apan kon molili ka sa social media, nagpadayon ang birahanay sa mga dumadapig ni PRRD ug sumosunod ni BBM, nga morag sila na ang kandidato.
Unsa kahay lintunganay sa gipaulbo nga storya ni PRRD batok ni BBM? Di ba kaha mao ni hinungdan unya ig-abot sa adlaw sa piliay nga magtinaktakay silang duha ni BBM ug Sara? O, di ba duna pay mas lawom nga kasabutan sila nga mora lang og gi drama ang katawhan sa ilang gipamulong? Atong sundon kini nga isyu.