KIDAPAWAN CITY -- Isang-at na ang kaso nga kalapasan sa Republic Act 11346, kon Tobacco Tax Law of 2019, sa tulo ka tawo nga nagpalusot og esmagol nga sigarilyo alas 11:00 sa buntag, Dominggo, Nobyembre 21, sa probinsiya sa Cotabato.
Giila ang mga suspek nga sila Mark Barte Villarin, 37-anyos, drayber; Gerald Falconite Vilalrin, 21-anyos; ug Abdulhaber Maladia Mohammad, 18-anyos, mga nagpuyo sa Zamboanga City.
Sumala kang Cotabato Police Provincial Director Colonel Henry Villar nga nakadawat sila og taho nga dunay mga esmagol nga sigarilyo ang ipalusot sa probinsiya nga karga sa panel truck.
Abtik nga nagpahigayon og sorprisa nga PNP checkpoint ang hiniusang puwersa sa Police Regional Office-Soccsksargen, 1st CPMFC, CPPO-PIU, Pikit PNP ug Aleosan PNP sa Barangay Bagolibas, Aleosan, Cotabato.
Pag-agi sa trak, gipahunong dayon kini sa mga pulis ug gisusi ang karga niini.
Didto nadiskubre ang nagkantidad og P890,000 nga smuggled cigarettes.
Walay napakita nga dokumento o papeles ang mga sakay sa panel truck, hinungdan nga sila gipangdakop.
Kahinumduman nga niadtong miaging semana, nakompiska sab ang dakong kantidad sa smuggled cigarettes sa Makilala, Cotabato.
Sa kasamtangan, ang mga suspek ang gibalhog sa prisuhan sa Aleosan, Cotabato ug padayon nga gi-imbestigahan.