TACURONG CITY -- Gimingaw sa pamilya ang rason sa pagbalik sa sabakan sa balaod sa duha ka opisyal sa New People’s Army (NPA) alas 11:00 sa buntag, Dominggo, Nobyembre 21, sa probinsiya sa Sultan Kudarat.
Ang mga rebelde nga misurender nga mga sub-commander ug iyang assistant nga mga miyembro sa Platoon Cherry Mobile, SRC Daguma, Far South Mindanao Region (FSMR).
Misurender ang mga NPA sa puwersa sa 37th Infantry Battalion Philippine Army nga gipangulohan ni Lieutenant Colonel Allen Van Estrera sa Barangay Tibpuan, Lebak, Sultan Kudarat.
Dala sa mga rebelde sa ilang pagsurender ang usa ka M14 rifle, usa ka Carbine M1 rifle, mga bala ug magasin.
Pormal nga gidawat ang mga NPA ni 603rd Brigade Commander Colonel Eduardo Gubat og LGU-Lebak sa ilang pagtahan.
Gikanayon ni Kumander Mike nga sila misurender gumikan gusto na nilang manginabuhing magmalinawon ug gimingaw na sab sila sa ilang pamilya tungod dugay na sila nga wala nakauli gumikan sa pagtago-tago sa kabukiran.
Kahinumduman nga una na nga nanurender ang mga sakop nila Kumander Mike ug Kumander Nilo sa militar.
Subling gi-aghat ni 603rd Brigade Commander Colonel Eduardo Gubat ang mga NPA nga wala pa mahigmata sa sayop nilang gipakigbisugan nga musurender na.