KIDAPAWAN CITY -- Luwas na ang mga sakay sa D4D van nga nahulog sa pangpang alas 3:30 sa hapon, Dominggo, Nobyembre 21, sa probinsiya sa Cotabato.
Ang mga biktima pulos mulupyo sa Cotabato City diin una nang nadala sa ospital ang napulo ka angol sa hitabo.
Matud ni Alamada Chief of Police Major Brian Espinoza nga sakay ang mga biktima sa usa ka D4D van gikan nanuroy sa Tent City pauli na sa siyudad sa Cotabato.
Pag-abot sa van sa dulhugon nga parte sa kalsada sa Barangay Barangiran, Alamada, Cotabato, kalit lang nawad-an sa kontrol sa manobela ang drayber ug diritso nga nahulog sa bung-aw.
Suwerte nga nasangit ang van sa punuan sa kahoy og igo lang naka-angkon sa ginagmay nga bun-og ang mga biktima.
Dali nga gitabangan sa mga molupyo sa maong dapit ang mga biktima ug gidala sa balay tambalanan pinaagi sa LGU-ambulance uban ang kapulisan.
Kahinumduman nga niadtong miaging semana sa susamang dapit, nahagbong sab sa pangpang ang mini-bus sa Bureau of Fire Protection-Barmm, diin usa ang namatay ug daghanan ang naangol.
Subling nagpasidaan ang LGU-Alamada ug kapulisan sa mga mobyahe ug muagi sa Alamada-Banisilan road nga mag-amping sa pagmaneho sa ilang sakyanan.