MALIPAYON ang mga residente sa Muslim Village, San Rafael sa Barangay 9-A, Davao City human sila nakadawat og mga grocery packs ug mga pagkaon niadtong nakalabay nga semana.
Kini hatud sa pipila ka mga negusyante ug mga pribadong indibidwal nga gipangunahan sa negusyante nga si CJ Conde, ang tag-iya sa Amaranta Suites sa Dr. Gahol, DMSF Drive, Bajada, Davao City.
Dako ang kalipay sa mga residente ug nagpasalamat nga nakadawat sila og ayuda human sila gibahaan sa miaging mga semana.
Sumala ni Conde nga lami paminawon sa kasingkasing ug hunahuna nga makatabang labi na sa mga naapektuhan sa kalamidad, diin bisan sa gamay nga butang, mapabati ug mapaambit kini kanila, alang sa kahupayan sa pait nga naagian.
“As human beings each of us has a responsibility to reach out and lend a helping hand to assist our brothers and sisters affected by disasters -- even in our smallest effort to alleviate the suffering of others. As Mother Teresa said, ‘It’s not how much we give but how much love we put into giving.’ Let us always remember... It’s good to be blessed but it’s even better to be a blessing,” sumala sa batan-ong negusyanteng si CJ.
Kauban ni CJ ang iyang mga higala nga walay hunong nga anaa sa iyang kiliran sa tanan nilang mga outreach activity sama nila Noe Nenaria II, Edward Melgo ug daghan pa, uban sa maabtikon nga kooperasyon ni Kagawad Suzet Rodriguez sa ilang feeding program sa Muslim Village.
“Ang pagtabang man gud, gikan gyod na sa kinailadman sa kasingkasing. Lami kaayo paminawon ang makatabang sa imong isi’g-katawo labi na sa mga higayon nga nanginahanglan sila,” ingon ni CJ.
Sila CJ regular nga nagaadto sa mga hilit nga dapit sa Davao City aron maghatud og mga grasya nga pagkaon ug mga tambal.
Bisan luyo sa init ug ulan, wala nila kini igsapayan, mapadalit lamang ang kinasingkasing nga tabang ug ilang makita ang walay-kinutuban nga pahiyom gikan sa mga natabangan.