ANG Pardo Police Station 7 sa Cebu City Police Office (CCPO) wala pay kasayoran atol ning pagsuwat bahin sa motibo sa pagpusil-patay sa usa ka lalake nga napalgang nagbuy-od sa Sityo Malipayon, Barangay Inayawan, siyudad sa Sugbo, pasado alas 8:00 sa gabii sa Dominggo, Nobiyembre 21.

Si Police Corporal Jeymos Tordios sa Pardo Police Station, kinsa duty investigator, nagkanayon nga unang giila ang biktima sa iyang alyas nga ‘Jujun Bayot.’

Apan, ang biktima giila nga si Tommy Uyanguren, 26, sa iyang kapuyo.

Ang maong lalake nga nagsul-ob og puti nga t-shirt ug blue nga maong nga pantalon nakaangkon daghang mga samad pinusilan sa lawas.

Dugang ni Tordios, ang dapit sa nahitaboan agianan ug kasagbutan sa daplin sa dan. Dunay kabalayan apan ang kasagaran nga ilang nahinabi nga residente sa dapit igo lang nisulti nga mga buto sa armas ang ilang nadunggan.

“Ang ingon nila mga ana-a sa lima ka buto ang ilang mga nadungog tungod lagi sa kahadlok nangahadlok na silang mogawas,” matod ni Tordios.

Ang mamumuno wala usab makita tungod sa kangitngit.

Samtang, usa ka Analyn Dulanta ang niadto sa purenarya ug positibo nga niila sa biktima nga iyang leave-in partner.

Si Dulanta niila ni Uyanguren, 26, taga Sityo Torre, Barangay Inayawan.