MATI CITY -- Mirumbo ang mga personahe sa Land Transportation Office (LTO)-Davao sa dakbayan sa Mati niadtong Nobyembre 19 diin ilang gisuhid ang pipila ka mga kalsada ug mismong sa atubangan sa Mati City Hall.
Gisaysay sa team leader sa LTO-Davao enforcement team nga si Brylle Molijon, ila lamang ginapatuman ang ilang mandato subay sa Republic Act 4136 kun ang Land Transportation and Traffic Code.
Gawas sa ilang mandato sa pagrehistro sa tanang mga sakyanan, ang LTO mamahimo usab mosita sa mga wala mituman sa mga balaod sa trapiko, mga migamit og ilegal nga plaka, lisensiya, ug uban pa, mga di saktong accessories sa sakyanan, mga nakalapas sa kapaspas sa pagpadagan ug daghan pa.
Si LTO-Mati head Bejamin Antonio nagbutyag nga ang maong operasyon gipahigayon sa LTO regional team ug bisan sila nakurat na lamang sa pagpahigayon sa maong operasyon.
Ang LGU-Mati nag-awhag karon sa tanang tag-iya og mga sakyanan sa siyudad nga mutuman sa tanang rekisitos ug reglamento nga ginapatuman sa nasyonal nga panggamhanan ug sa mga buhatan niini sama sa LTO aron dili maapektuhan sa bisan unsa pa mang mga operasyon sa mosunod nga mga adlaw. (CIO MATI/Kristine Garcero/JPC)