DAKO ang kalipay sa mismong lokal nga panggamhanan sa Davao City ug sa mga vaccination cluster sa Davao City Health Office human nga ilang naabot ang mokabat kapin kon kulang 1 milyon ka mga Dabawenyo nga nabakunahan kontra Covid-19 alang sa first dose.
Sa report sa City Information Office (CIO) Davao, anaa sa 1.2 milyon ang target nga mabakunahan aron maabot ang herd immunity sa siyudad sa Davao.
Sa People's Park, nga usa sa mga vaccination cluster sa Davao City, nag-selebrar ang mga sakop sa CHO human nga naabot ang ilang gitinguha.
Sa ilang selebrasyon, naggunit sila og mga balon nga porma og letra dayon dunay sab cake nga dunay marka nga 1 milyon.
"Dili lang ta mosulti, dili lang ta mo-promise. Dili lang pud na mosulti that we are truly confident. Paningkamutan nato kining ma-achieve ang demand sa atoang national government to hit the target of 100 percent herd immunity sa Davao City," ingon ni Mayor Sara Duterte-Carpio, kinsa nagbutyag nga anaa na sa 1,010,811 ka mga Dabawenyos ang nakadawat sa bakuna sa unang first doses kun 84.23 percent alang sa 1.2 million target herd immunity.
Anaa sab sa 908,101 ka mga indibiduwal ang nakadawat sa ilang second doses kun 75.67 percent alang sa herd immunity target.
Nasayran nga moapil ang Davao City Government sa National Vaccination Days karong Nobyembre 29 hangtud Disyembre 1, 2021 aron nga makuha ang target nga 147,313 ka mga indibiduwal nga mabakunahan sulod sa tulo ka adlaw.