NASUBO ug nangayo og hustisya ang mga kabanay sa 27-anyos nga lalaki nga masilutan gayod ang duha ka menor de edad nga mipatay niini didto sa Quezon Street, Barangay Poblacion, Lupon, Davao Oriental.
Sa pinakaulahing impormasyon, nasayran nga anaa na sa kustodiya sa Lupon Municipal Police Station ang duha ka menor de edad kinsa nakuhaan og sundang ug ice pick nga maoy gigamit sa pagpatay sa biktima nga si Vincent Almeda Sumaoy, alyas Enteng, taga NHA, Barangay San Antonio, Davao City.
Ang biktima miduyog sa birthday sa iyang ig-agaw sa Lupon diin sa tugkaran giingong nag-vape ang biktima.
Nasayran nga naasohan ang duha ka suspek diin nangasuko ug gilayong gidunggab ang biktima og ice pick. Wala pa sila nakontento, ila pa kining gitigbas dayon nanagan.
Nakapangayo pa og pakitabang ang biktima sa ilang kabanay apan taud-taod mabugtoan na kini sa kinabuhi.
Sumala sa Lupon police nga maghulat sila sa mando sa Municipal Social Welfare and Development Office alang sa tukmang aksiyon ngadto sa duha ka menor.
Sa kasamtangan, ang duha ka menor de edad anaa sa pagkustodiya sa Women and Children Protection Desk sa Lupon police, samtang ang patay nga lawas sa biktima anaa na gihaya sa ilang panimalay.