Pulis: Mga krimen ubos gihapon tungod sa curfew

PABILIN nga ubos ang crime volume sa Dakbayan sa Sugbo bisan kon giluagan na ang quarantine restrictions dinhi sa Inter-Agency Task Force nunot sa pag tibugsok sa mga kaso sa coronavirus disease 2019 (Covid-19) sa siyudad.

Matod ni Police Lieutenant Colonel Wilbert Parilla, deputy city director for operations sa Cebu City Police Office (CCPO) nga dako og natampo mao ang hugot nga pagpatuman sa curfew.

Pasabot ni Parilla nga panahon sa mga oras sa curfew, wa nay mga tawo nga naa sa gawas nga nagsuroysuroy lang sanglit nahipos na sila ug naa na sa ilang tagsa-tagsa ka mga balay.

Matag police station ginagmay ra nga mga kaso ang matala sa theft and robbery.

Adunay lima ka sunod-sunod nga mga kaso sa pagpamusil sa siyudad apan ang tanan pulos nasulbad tungod kay nailhan man ang mga suspek ug gipasakaan nag kaso sa korte.

BULABUGON GIHAPON

Tungod niini, di mo hunong ang CCPO sa ilang Oplan Bulabog matag gabii kay kini usa sa labing epektibo pagbatok sa kriminalidad.

Sa talaan sa operations branch sa CCPO, moabot sa 110 ang nadakpan sa Oplan Bulabog sa Lunes sa gabii, Nobiyembre 21, 2021, diin 91 niini mga hamtong na samtang siyam ang menor nga malampuson nga na rescue.

Ang mga menor de edad naa pa sa gawas bisan sa lawom nang gabii. Samtang 91 usab ang nadakpan tungod sa kalapasan sa curfew ug 19 ang way face mask.

Pasabot ni Parilla nga ilang gisugyot sa Emergency Operations Center (EOC) nga ipabilin ang pagpatuman sa curfew tungod kay dako kaayo og tabang sa pag menos sa kriminalidad tungod kay limitado lang ang lihok sa mga tawo.

“Mao na ang atong gi-suggest sa EOC nga magpabilin lang na ang atoang curfew kay not only nga makatabang ni siya sa pag maintain sa Covid, but it helps a lot gyud sa atong anti criminality,” matod ni Parilla.

Kon aduna may adjustment sa curfew, labing maayo nga alas 12 sa tungang gabii magsugod hangtod sa alas 4 sa kaadlawon aron taas-taas ang oras sa mga tawo nga gustog maglipay sa mga imnanan ug mabuhi usab ang ekonomiya.

Apan kinahanglan nga 30 minutos sa dili pa ang curfew, dili na modawat og order sa ilimnon nga makahubog ang mga imnanan aron makapauli pa ang ilang mga kustomer.

“We even suggested nga since considering that is 11:30, pwede nana siyang himuon nalang nga 12 at least by 12 midnight up to 4 o’clock that would be our curfew time. At least naa gihapon tay control,” dugang ni Parilla.