GIKLARO sa Commission on Elections (Comelec) nga ang substance o drug abuse dili usa ka ground o basihanan nga ma-disqualify ang usa ka kandidato. Ang substance abuse dili usa sa disqualification sa usa ka magpapili sa eleksiyon nga naa sa balaod ug bisan nag-atubang kini og criminal offense, matod ni Comelec spokesman James Jimenez.

Si Jimenez nagkanayon nga gisuwayan kini pag-implementar sa Comelec kaniadto nga himuong requirement sa presidential candidates ang drug test pinasikad sa probisyon sa Comprehensive Dangerous Drug Act of 2002 nga mandatory drug testing sa gustong magpapili og public office isip requirement. Apan ang Supreme Court mideklarar sa maong probisyon nga unconstitutional niadtong 2008.

Ang atong 1987 Constitution, Section 2, Article 7 (Executive Department) nagkanayon nga; ‘No person may be elected President unless he is a natural born citizen of the Philippines, a registered voter, able to read and write, at least 40 years of age on the day of the election, and a resident of the Philippines for at least 10 years immediately preceding such election.’

Ang bise presidente mao usab ang qualifications ug requirements.

Ang Comelec mipagawas niining maong pamahayag human si Presidente Duterte namasangil nga usa ka kandidato sa pagka-presidente tiggamitan og cocaine. Apan wala hinuon kini niya hinganli. Niingon lang si Digong nga ang maong kandidato gikan sa hamili og datu nga banay. Kinsa may kandidato diha nga gikan og datung banay?

Busa, wala diay gihapon silbi kon magmando o mag-require sa mga kandidato nga magpa-drug test kay dili man ni mahimong requirement. Kining drug test gud, dili man usab kasaligan kon dili nimo i-surprise o kinalit kay makaandam man ang hingtungdan. Dili man ma-detect sa drug test kon dugay nang tiggamitan og drugas ang usa ka tawo.

Bisan kon dili kini requirement, sila si Reporma Presidential aspirant Senador Panfilo ‘Ping’ Lacson ug ang iyang runningmate nga si Senate President Tito Sotto nagpa-drug test gihapon aron mahimong modelo. Negatibo sila.(bobbygnalzaro@gmail.com)